Publiká riba 02 Novèmber 2026
Willemstad, 2 novèmber 2026 – Djaweps 5 di novèmber 2026 lo tuma kontinuashon di e konferensia tokante di konekshon entre enseñansa i merkado laboral na Kòrsou.
E konferensia aki ta forma parti di e esfuersonan ku Ministerio di Enseñansa, Siensia, Kultura i Deporte (ESKD), den kolaborashon ku otro ministerionan i sektor empresarial, ta realisando pa mehorá e preparashon di nos hóbennan pa merkado laboral.
E nesesidat di un mihó konekshon entre enseñansa i merkado laboral, disponibilidat di lugánan di stazje i kolaborashon ku empresanan ta un tópiko ku ta risibí atenshon den komunidat i Parlamento.
E konferensia aki ta un kontinuashon di un proseso ku a kuminsá ku e promé konferensia na mei di e aña aki, kaminda representantenan di enseñansa, sektor empresarial i instansianan gubernamental a interkambiá nan eksperensianan i rekomendashonnan.
Durante e konferensia di 5 di novèmber lo presentá i validá e resultadonan di e promé konferensia, e avansenan den implementashon di e rekomendashonnan i e pasonan ku ainda mester ser tumá.
Un di e temanan sentral lo ta e mehorashon di oportunidatnan di stazje i formashon práktiko. Representantenan di sektor públiko, privá i empresarial i di enseñansa lo interkambiá idea tokante di e papel di “leerbedrijven” i “leermeesters”, e guia di studiantenan i e responsabilidat konhunto di skolnan, empresanan i gobièrnu den e trayekto aki.
Atenshon spesial lo bai tambe na komportashon, aktitut i mentalidat profeshonal na trabou, komo atributonan esensial pa un integrashon eksitoso den merkado laboral.
Un otro parti importante di e programa lo ta e presentashon di Konseho Sosial Ekonómiko (SER), ku lo elaborá riba e tópiko i e nesesidat i balor agregá di un posibel Konseho pa Futuro di Trabou i Edukashon (TWE).
E konsepto aki ta dirigí riba fortalesementu di diálogo i asesoramentu struktural tokante di desaroyonan aktual i futuro di merkado laboral i e konsekuensianan pa enseñansa.
Den e konteksto aki, lo mester konsiderá tambe e konekshon ku strukturanan eksistente, manera p.e. ROA.
E resultadonan di e konferensia aki tambe lo sirbi komo base importante pa formulashon di maneho di enseñansa vokashonal na nivel di VSBO, SBO i HBO pa e añanan benidero. E meta ta pa e enseñansa konektá mihó ku e nesesidatnan di merkado laboral, sin pèrdè di bista e desaroyo personal i profeshonal di nos studiantenan. Ademas, e konferensia mester kontribuí na kontinuashon di e operashonalisashon i ehekushon di e Letter of Intent (LOI) entre e ministerionan di ESKD, SOAW, MEO i BPD. E intenshon ta pa tradusí e kompromisonan konhunto den akshonnan konkreto, ku responsabilidatnan kla i un mekanismo pa sigui e progreso di nan implementashon.
Ku e konferensia aki, e minister di OWCS Sithree van Heydoorn ta duna ehekushon konkreto na realisashon di e plan de mehorashon di enseñansa, i asina duna tur mucha i hoben oportunidat igual pa eduká i desaroyá nan mes potensial.
Ku e konvikshon ku solamente mediante esfuerso konhunto por logra resultadonan duradero ministerio di ESKAD ta sigui traha riba un kolaborashon struktural entre enseñansa, gobièrnu i sektor privá i empresarial,
Di diálogo pa akshon: huntu nos ta konstruí un enseñansa ku ta prepará nos hóbennan pa e oportunidatnan di trabou di awe i di mañan.