Gobièrnu ta bai Korte: Minister di GMN ta konsiderá wèlga di dòkternan di kas irasonabel i inaseptabel - Informashon tokante Gobièrnu di Kòrsou

Gobièrnu ta bai Korte: Minister di GMN ta konsiderá wèlga di dòkternan di kas irasonabel i inaseptabel

Salubridat Públiko, Medio Ambiente i Naturalesa
 

Gobièrnu ta bai Korte: Minister di GMN ta konsiderá wèlga di dòkternan di kas irasonabel i inaseptabel

Publiká riba 02 Novèmber 2026

KOMUNIKADO DI PRENSA

Publiká 2 di novèmber 2026

Dia 31 di òktober 2026, Minister di Salubridat, Medio Ambiente i Naturalesa (GMN) a hasi un yamada por eskrito na Curaçaose Huisartsen Vereniging (CHV) pa garantisá kontinuidat di kuido médiko di promé liña. Minister a pidi CHV pa move nan reunion di djaluna 2 di novèmber 2026 pa despues di 17:00, ora ku Huisartsenpost (HAP) por asumí e kuido médiko, sin ku pashèntnan den nos komunidat mester sufri konsekuensia di e akshon.

Apesar di e petishon akí, CHV a disidí pa kuminsá wèlga for di awe durante oranan regular di konsulta.

Segun Gobièrnu, e desishon di CHV i su miembronan no ta den interes general. Miles di hende ta keda afektá, entre nan pashèntnan ku no por risibí kuido médiko regular, pero tambe personanan vulnerabel den kasnan di kuido i kasnan di ansiano, manera hende grandi di edat i personanan ku limitashon.

Gobièrnu ta konsiderá un wèlga di dòkternan di kas na nivel nashonal komo un medida desproporshonal, pasobra e konsekuensianan pa kontinuidat i aksesibilidat di kuido médiko pa henter poblashon di Kòrsou ta demasiado grandi i no ta den proporshon ku e konflikto ku ta na base di e wèlga.

Segun Gobièrnu, e interes general di garantisá bon kuido médiko aksesibel pa poblashon di Kòrsou ta pisa mas ku e interesnan finansiero di un grupo profeshonal manera dòkternan di kas. P’esei, Gobièrnu ta konsiderá e wèlga akí inaseptabel.

Ademas, e wèlga ta irasonabel, mirando ku dòkternan di kas ta risibí un kompensashon ampliamente sufisiente i ku no tin un motibu urgente pa deklará un wèlga na nivel nashonal.

CHV a pidi Minister di GMN pa oumentá e tarifa di abonamentu ku Cg 30 pa pashènt pa aña, den un término masha kòrtiku, komo kompensashon pa e gastunan mas haltu di práktika. Un oumento asina lo nifiká ku e kompensashon total pa dòkternan di kas lo subi ku mas di Cg 4 mion pa aña.

Minister a informá CHV ku evaluashon di un petishon asina ta rekerí un investigashon di Regulatory Authority Curaçao (RAC), na kua dòkternan di kas mester duna nan kolaborashon.

Esaki ta konta pa tur petishon pa oumento di tarifa den sektor di salú, spesialmente ora ta trata di kompensashon pa gastunan di práktika, pasobra no tur gasto di práktika por wordu atribuí na kuido médiko legítimo di pashèntnan.

Un investigashon di RAC promé ku aprobá un eventual oumento di tarifa ta un liña di maneho ku Gobièrnu a sigui konsekuentemente te awor.

Sinembargo, dòkternan di kas a disidí pa bai wèlga promé i eksigí un oumento temporal di tarifa for di Minister di GMN promé ku nan bolbe kuminsá ku nan oranan di konsulta. Esaki no ta aseptabel pa Gobièrnu.

E tarifa di abonamentu ku SVB ta paga na dòkternan di kas ta aproximadamente Cg 182 pa aña pa kada pashènt registrá serka un dòkter di kas. Aktualmente Kòrsou tin aproximadamente 140.000 asegurado di BVZ i 87 dòkter di kas registrá serka SVB komo dòkter ku ta kolaborá ku SVB.

Esaki ta nifiká ku un dòkter di kas tin na promedio aproximadamente 1.600 pashènt den su práktika. Pa un práktika di e tamaño akí, e dòkter ta risibí aproximadamente Cg 291.000 pa aña di SVB, esta aproximadamente Cg 24.300 pa luna.

E kantidat máksimo di pashènt pa un práktika ku un solo dòkter ta 2.500 pashènt. Esaki ta representá aproximadamente Cg 455.000 pa aña, òf Cg 38.000 pa luna na kompensashon di SVB pa un dòkter di kas.

Ademas, e dòkter di kas por deklará otro servisionan serka SVB, manera bishitanan na kas di pashènt, pa kua e ta risibí un kompensashon adishonal riba e tarifa di abonamentu.

Promé ku introdukshon di Huisartsenpost (HAP), kada dòkter di kas tabata responsabel pa kuido di su propio pashèntnan 24 ora pa dia, shete dia pa siman.

For di 1 di yanüari 2024, HAP ta asumí e kuido médiko for di 17:00 te mainta siguiente, durante fin di siman i dianan di fiesta. Gobièrnu ta karga kompletamente ku e gastunan di HAP.

Debí na esaki, dòkternan di kas ta responsabel pa nan pashèntnan durante konsiderablemente ménos ora, pero nan ta sigui risibí e mesun kompensashon di SVB ku promé. Esaki ta representá un mehorashon real di entrada, ku mester wordu konsiderá komo un indeksashon di e entrada básiko di dòkternan di kas.

Ademas, un dòkter di kas ta risibí e tarifa di abonamentu di SVB pa kada pashènt registrá, asta si e pashènt no bishitá e dòkter ni un solo biaha durante henter aña.

Un parti di e pashèntnan registrá no ta bishitá nan dòkter, òf ta hasi esaki masha poko biaha. Esaki tambe ta un bentaha pa e dòkter di kas, pasobra independientemente si e pashènt a bishitá e dòkter òf nò, e dòkter ta risibí un kompensashon fiho di aproximadamente Cg 182 pa kada pashènt registrá serka SVB.

Gobièrnu ta di opinion ku pashèntnan no mester bira víktima di un diskushon tokante e tarifa ku SVB ta paga na dòkternan di kas, un tarifa ku, segun Gobièrnu, ya a wordu indeksá di manera sustansial ku introdukshon di HAP.

Mirando su responsabilidat pa kuido di salú den nos komunidat, manera stipulá den Staatsregeling di Kòrsou, Gobièrnu lo inisiá inmediatamente un prosedura di kort geding kontra CHV i/òf su miembronan ku ta partisipá den e wèlga, pa asina Korte, komo instansia independiente, por duna su huisio tokante e situashon ku a surgi.