MINISTER BOEKHOUDT DI GMN A DUNA INSTRUKSHON PA ESTABLESÉ UN ORGANISASHON NASHONAL DI EMERGENSIA PA GARANTISÁ KONTINUIDAT DI KUIDO MÉDIKO - Informashon tokante Gobièrnu di Kòrsou

MINISTER BOEKHOUDT DI GMN A DUNA INSTRUKSHON PA ESTABLESÉ UN ORGANISASHON NASHONAL DI EMERGENSIA PA GARANTISÁ KONTINUIDAT DI KUIDO MÉDIKO

Salubridat Públiko, Medio Ambiente i Naturalesa
 

MINISTER BOEKHOUDT DI GMN A DUNA INSTRUKSHON PA ESTABLESÉ UN ORGANISASHON NASHONAL DI EMERGENSIA PA GARANTISÁ KONTINUIDAT DI KUIDO MÉDIKO

Publiká riba 06 Novèmber 2026

ANUNSIO

Publiká 5 di novèmber 2026

Willemstad – Minister di Salubridat, Medio Ambiente i Naturalesa (GMN), Tyron Boekhoudt, a duna instrukshon pa establesé un organisashon nashonal di emergensia, ku tin komo ophetivo protehá kontinuidat di servisio na komunidat den sektor di salú kontra interupshonnan kolektivo di trabou, okashoná pa gruponan profeshonal òf partidonan komersial ku tin un posishon di monopolio den práktika.

E susesonan resien na Kòrsou, kaminda akshonnan simultáneo di Curaçaose Huisartsen Vereniging (CHV) i Vereniging van Apotheek Eigenaren (VAE) a perturbá gravemente aksesibilidat di kuido médiko primario i suministro di remedi, ta pone na kla un vulnerabilidat institushonal inaseptabel.

Paralisá servisio médiko regular komo medio di preshon pa eksigí tarifa mas haltu ta afektá miles di siudadano i gruponan vulnerabel direktamente. Huisartsenpost ta garantisá kuido médiko di 17:00 te 08:00, durante wikènt i dianan di fiesta, pero durante dia no tin un struktura di respaldo.

Aunke tin derecho pa tuma akshon kolektivo, e derecho aki no ta apsoluto. E derecho ei mester sede ora infrastruktura básiko di nos komunidat ta na peliger. Ora ta usa servisionan vital komo medio di chantahé inapropriá, ta pone nos komunidat den un situashon di rehén. Minister no por tolerá ku pueblo ta bira víktima di esaki.

Basá riba artíkulo 25, promé insiso, di Staatsregeling van Curaçao, Gobièrnu tin e obligashon di tuma medidanan pa promové salubridat públiko. Asina Gobièrnu ta karga ku e responsabilidat final pa organisashon i promoshon di salubridat públiko.

E obligashon aki, stipulá den Staatsregeling, no ta duna Minister di GMN solamente e outoridat, sino tambe e responsabilidat pa intervení ora aksesibilidat di kuido médiko pa un parti grandi di poblashon òf pa gruponan vulnerabel ta den peliger.

Personanan privá, asos iashonnan i partidonan komersial no tin e responsabilidat konstitushonal pa bienestar kolektivo di pueblo di Kòrsou. E responsabilidat aki ta keda kompletamente serka Gobièrnu i, den e kaso aki, serka Minister di GMN.

E echo ku Gobièrnu a haña su mes obligá di entamá un kort geding pa restablesé servisio médiko regular ta demonstrá ku un sistema di kuido médiko sin fasilidatnan di emergensia di Gobièrnu ta dependé demasiado di partidonan privá.

Pa garantisá òrdu públiko i interes general den futuro, Ministerio di GMN i SVB, ku sosten di Inspekshon pa Salubridat Públiko, Huisartsenpost (HAP) i CMC, ta kuminsá inmediatamente ku organisashon di strukturanan operashonal di respaldo i fasilidatnan di krísis den sektor di salú.

E strukturanan i fasilidatnan aki lo permití Gobièrnu tuma kontrol di prestashon di servisio den e kadena vital aki, den kaso di un huelga òf interupshon di trabou di sierto magnitut òf durashon krítiko, organisá òf okashoná pa personanan privá, asos iashonnan òf partidonan komersial den sektor di salú.

E struktura di emergensia lo ta basá riba tres pilar stratégiko:

1. Designashon di Sentronan Médiko Temporal

Establesé puestonan médiko di emergensia ku por tuma kuido di pashèntnan inmediatamente durante huelganan masivo òf interupshonnan di trabou di dòkternan lokal. E puestonan aki lo funshoná ku dòkternan kalifiká, ku ken Gobièrnu lo sera kontrato òf hasi akuerdonan di antemano.

2. Establesementu di Sentronan Regional di Distribushon di Remedi di Gobièrnu

Establesé diferente punto regional pa distribushon di remedi, esta botikanan di Gobièrnu, kaminda botikarionan designá pa Gobièrnu lo suministrá remedi bou di supervishon di Inspectie Geneesmiddelen.

3. Gobièrnu komo importadó sentral di remedi

Si importadónan di remedi tambe stòp ku nan servisio, Gobièrnu lo importá remedi independientemente i suministrá nan via botikanan di Gobièrnu.

Pashèntnan no mester bolbe bira víktima di un konflikto tokante kompensashon finansiero.

Pa implementá e medidanan aki, ta preparando kambio den e legislashon relevante, inkluyendo Landsverordening zorginstellingen, Landsverordening geneesmiddelenvoorziening i Tijdelijke landsverordening beperking vestiging medische beroepsbeoefenaren.

Te ora e kambionan legal aki drenta na vigor, Gobièrnu lo hasi uso di e outoridatnan legal eksistente. Denter di tres luna mester elaborá un plan kompleto ku presupuesto i un proposishon pa e kambionan di lei nesesario, pa Raad van Ministers por tuma un desishon.

E medidanan di maneho aki tin komo ophetivo neutralisá e konsekuensianan di monopolionan den prestashon di servisio na komunidat den sektor di salú.

Di e manera aki, Gobièrnu lo garantisá ku e servisionan vital den sektor di salú na Kòrsou ta sigui funshoná na tur momentu.