Publiká riba 13 Novèmber 2026
Gobièrnu ta laga ehekutá un ‘Quick Scan’ pa SOAB i SVB
Willemstad – Riba djaweps, 12 di novèmber, Promé Minister Gilmar Pisas, asistí pa Minister di Finansa, Sr. Cooper i Minister di Salubridat, Medio Ambiente i Naturalesa, Sr. Boekhoudt, a tene kòmbersashonnan na nòmber di Gobièrnu ku representantenan di un grupo di nuebe instituto di kuido ku a aserká su persona pa konhuntamente deliberá riba posibel solushonnan pa nan situashon finansiero. E grupo di nuebe instituto di kuido ta konsistí di:
Durante di e reunion, a papia riba nesesidatnan di e institutonan di kuido akí i e situashon pa loke ta trata personal. Meskos ku otro instansianan e institutonan akí tambe ta enfrentá retonan pa atraé i retené personal kualifiká.
Gobièrnu ta apresiá e dedikashon di e empleadonan den e institutonan akí i otro instituto di kuido i ta deseá pa den kòmbersashonnan hibá ku e sektor, yega na reformanan sostenibel. Esaki ta inkluí maneho operashonal efisiente, inkluso kolaborashon amplio den e sektor, maneho profeshonal i finansiamentu personalisá. Den e kuadro akí, Minister Boekhoudt di GMN a presentá e institutonan un akuerdo na òktober último, den kua a pone vários punto di akshon pa ehekushon konhunto di un agènda di reforma pa e parti aki di e sektor di kuido médiko. Lo establesé un ‘stuurgroep’ pa supervisá e implementashon di e akuerdo durante e próksimo dos añanan.
A akordá, ku pareu ku e implementashon di e akuerdo, Gobièrnu lo laga SOAB i SVB hasi un ‘quick scan’ na e institutonan di kuido akí den e próksimo simannan pa determiná den ki forma por duna sosten na e institutonan akí riba término kòrtiku den e posibilidatnan presupuestario ku t’ei ainda den 2026. Ta spera e resultadonan di e ‘quick scan’ mas tardá pa 11 di desèmber 2026.
Pa e añanan ku ta sigui kuminsando for di 2027, Gobièrnu ta sigui e liña di maneho ku ahustenan struktural na tarifanan òf presupuestonan di kuido por ser konsiderá, na momentu ku e estudio di tarifa hasí pa Regulatory Authority Curaçao (RAC) i e estudio di kondishonnan di empleo enkargá pa Banko di Seguro Sosial (SVB) ta kompletá. Esaki lo ta e kaso probablemente despues di e promé kuartal di 2027.