Publiká riba 16 Novèmber 2026
Willemstad, 16 di novèmber 2026 – Den un ambiente alegre, ku presensia di minister Charles Cooper (VVRP), representantenan di ministerio, miembronan di prensa i invitadónan, a selebrá awe e lansamentu ofisial di e promé servisionan digital di e sektor di tráfiko i transporte.
Ministerio di Maneho di Gobernashon, Planifikashon i Servisio Públiko (BPD) i Ministerio di Tráfiko, Transporte i Planifikashon Urbano (VVRP) a uni forsa pa e logro importante aki den e proseso di modernisashon di servisio gubernamental.
Durante e evento, e dos ministerio a enfatisá e balor di inovashon, koperashon interministerial i e enfoke riba e kliente komo pilarnan pa mehorá e servisio na siudadano- i empresarionan.
E lansamentu aki ta e resultado di un kolaborashon intensivo entre e tim di Lokèt di Pèrmit (BPD) i e Organisashon di Tráfiko i Transporte (UOVV, VVRP). Nan a traha huntu pa digitalisá i simplifiká diferente proseso den transporte públiko. E plataforma digital e-CuraCase a hasi posibel pa integrá e proseso- i produktonan aki den un solo sistema moderno, transparente i efisiente.
Entrante awe, e siguiente servisionan ta disponibel online pa públiko:
Ku introdukshon di e servisionan digital aki, e siudadano no solamente ta dependé di un bishita físiko na e lokèt di pèrmit. Pero tambe por entregá e petishonnan online na un manera mas lihé, transparente i konveniente.
E paso aki ta simbolisá un avanse signifikante den e transformashon digital di gobièrnu. Pa medio di koperashon aki, e dos ministerionan ta reafirmá nan kompromiso pa modernisá servisio públiko, redusí e uso di papel i pone e nesesidatnan di siudadano mas sentral.
Ku e introdukshon di awe, e servisionan online aki ta ofisialmente habrí i disponibel pa tur residente i empresario pa medio di Loket Digital.