Direktornan di VVRP ta evaluá planifikashon di 2026 i retonan
Publiká riba
18 Novèmber 2026
Willemstad – Resientemente, a tuma lugá un reunion struktural di direktornan di Ministerio di Tráfiko, Transporte i Planifikashon Urbano (VVRP). Durante e reunion aki, direktornan di diferente instansia di e ministerio a reuní pa trata tópikonan importante relashoná ku organisashon i maneho, ku atenshon speshal pa planifikashon anual di 2026 i retonan ku ministerio ta enfrentá den e próksimo periodo.
Un parti importante di e reunion tabata enfoká riba asuntunan di personal. Den e konteksto aki, a trata, entre otro, e nesesidat di personal den diferente instansia i e proseso pa reklutá personal nobo. Atraé personal sufisiente i kualifiká ta keda di gran importansia pa por ehersé e tareanan i responsabilidatnan di ministerio di un manera efikas.
Ademas, a trata diferente asuntu hurídiko i kasonan den korte ku tin relashon ku e trabounan di ministerio. Tambe a dediká atenshon na digitalisashon di proseso di trabou. Den e kuadro aki, a duna un presentashon tokante un sistema digital ku lo ser publiká pa Projectteam Toezicht en Handhaving (PTH), ku lo sirbi pa registrá i raportá keho. E desaroyo aki por kontribuí na un manera di traha mas strukturá, mihó ‘follow-up’ i un maneho mas efisiente di notifikashon.
E reunion struktural di direktornan ta forma un plataforma importante pa kordinashon, interkambio di konosementu i kolaborashon entre diferente organisashon di VVRP. Dor di evaluá regularmente e progreso, prioridatnan i retonan huntu, e ministerio ta sigui traha pa logra un mihó kordinashon interno i un ehekushon dirigí riba su responsabilidatnan.