WILLEMSTAD – Ministerio di Desaroyo Ekonómiko (MEO) ta lansa Curaçao Creative, un plataforma nobo pa sektor kreativo di Kòrsou. E inisiativa ta forma parti di e Strategia Nashonal di Eksportashon pa Industria Kreativo 2022–2027 i ta kontribuí na desaroyo di e sektor.
Curaçao Creative ta dirigí, entre otro, riba músika, pelíkula, video, fotografia, arte, diseño, moda, merkadeo, komunikashon i servisio digital. Profeshonalnan i empresarionan di otro áreanan kreativo tambe ta bon biní.
“Sektor kreativo tin hopi talento i oportunidat ekonómiko. Ku Curaçao Creative, nos ke konektá empresarionan i profeshonalnan kreativo ku otro, i duna nan mas visibilidat. Asina nos ta sigui konstruí huntu un sektor fuerte ku no solamente ta krese lokalmente, sino ku tambe por probechá di oportunidatnan riba merkadonan internashonal,” asina Minister di Desaroyo Ekonómiko, dr. Roderick Middelhof, a deklará.
A desaroyá e identidat visual di Curaçao Creative a base di ideanan di 97 persona for di e sektor kreativo. E lèter C ku forma di ola ta representá konekshon i kolaborashon. E kolónan ta inspirá riba Handelskade i ta reflehá e diversidat di e diferente áreanan kreativo.
Curaçao Creative Conference dia 2 i 3 di desèmber
Den kuadro di lansamentu di e plataforma Curaçao Creative, MEO lo organisá un di e promé eventonan bou di e inisiativa aki: Curaçao Creative Conference, ku ta tuma lugá dia 2 i 3 di desèmber 2026. E konferensia ta reuní talento kreativo, profeshonal, empresario, organisashon i otro partnernan ku ta kontribuí na desaroyo di e sektor.
Durante e konferensia, partisipantenan por kompartí konosementu, establesé kontakto nobo i haña mas informashon tokante desaroyonan i oportunidatnan komersial den e industria kreativo.
Bo ta traha den sektor kreativo? Reservá dia 2 i 3 di desèmber den bo agènda. Sigui Curaçao Creative i MEO riba retnan sosial pa informashon tokante e programa, lokalidat i registrashon. Pronto e website di Curaçao Creative tambe lo ta online.
