Ministernan di Enseñansa Siensia Kultura i Deporte di reino ta reafirmá nan kompromiso pa fortalesé koperashon den Reino Hulandes riba tereno di enseñansa, siensia i kultura - Informashon tokante Gobièrnu di Kòrsou

Ministernan di Enseñansa Siensia Kultura i Deporte di reino ta reafirmá nan kompromiso pa fortalesé koperashon den Reino Hulandes riba tereno di enseñansa, siensia i kultura

Enseñansa, Siensia, Kultura & Deporte
 

Ministernan di Enseñansa Siensia Kultura i Deporte di reino ta reafirmá nan kompromiso pa fortalesé koperashon den Reino Hulandes riba tereno di enseñansa, siensia i kultura

Publiká riba 18 Novèmber 2026

Philipsburg, Sint Maarten – 18 di novèmber 2026

Dia 17 i 18 di novèmber 2026, e minister di Enseñansa, Siensia, Kultura i Deporte di Kòrsou, sr. Sithree van Heydoorn huntu ku su delegashon, a partisipá na e konsulta ministerial di kuater pais di Reino (M4LO), ku a tuma lugá na Sint Maarten. E konsulta a reuní delegashonnan enkabesá pa ministernan di Aruba, Kòrsou, Sint Maarten i Hulanda pa sigui fortalesé koperashon den enseñansa, siensia i kultura. Partikular di e konsultá di e aña aki ta ku el a konta ku presensia di representantenan di Boneiru, Saba i Statia (BES).

Pa motibu di sirkunstansianan eksepshonal polítiko na Hulanda, e delegashon Hulandes tabata presente pero e minister hulandes di Enseñansa, Kultura i Siensia sra. Letschert, no por a biaha pa St. Maarten pa partisipá en persona na e reunion. Konsiderando importansia di un diálogo ministerial sustansial, e paisnan a bai di akuerdo ku su partisipashon virtual.

Un di e tópikonan prinsipal ku a ser tratá tabata e futuro di Strategic Education Alliance (SEA), un programa di koperashon dirigí na mehorá oportunidatnan i éksito di estudio di studiantenan karibense den Reino. Den e konklushonnan final e ministernan a bai di akuerdo pa prolongá e programa te ku 2028, ku posibilidat di un aña adishonal te ku 2029, esaki pa garantisá durabilidat di e resultadonan ku SEA ya a alkansá i realisashon di e plannan pa futuro.

E tópiko di Braingain ku tin komo meta stimulá regreso, retenshon i kontribushon di talento karibense na desaroyo di nos paisnan tambe a ser ratifiká. Esaki a konkluí ku un agènda di trabou di 2027-2030  ku ocho área di prioridat ku mester kontribuí na un aserkamentu mas struktural i konhunto entre gobièrnu, institushonnan di enseñansa i sektor empresarial.

Hulanda ta den proseso di kambionan den enseñansa ku tin impakto pa e paisnan den Karibe. Konsekuentemente e paisnan a enfatisá importansia di ser informá na tempu i un bon kordinashon den e aktualisashon di programanan di eksámen i metanan di enseñansa. Pa Kòrsou ta fundamental ku kualke adaptashon ta tuma na konsiderashon e realidat lokal, oportunidatnan igual pa tur alumno, posibilidat di kontinuá estudio i rekonosementu di diploma den Reino.

Tambe a pone atenshon na formashon di dosentenan, enseñansa profeshonal i fortalesimentu di koperashon entre institushonnan di enseñansa superior i investigashon sientífiko.

Pa loke ta e área di kultura i patrimonio kultural, e paisnan a enfoká riba nesesidat di un koperashon mas kordiná i efektivo, ku ta hasi mihó uso di e kapasidat i rekursonan disponibel. Atenshon spesial a bai na protekshon di patrimonio kultural íntangibel i preparashon di e promé nominashon karibense konhunto pa lista di UNESCO, ku ta programá pa mart 2029.

Minister van Heydoorn den su diskurso tantu na apertura komo klousura di e konsultá a enfatisá riba su deseo pa yega na  un koperashon den Reino Hulandes mas stratégiko i dirigí riba resultado duradero. Den su diskurso di klousura, minister van Heydoorn tambe a reflehá riba e manera ku e konsultanan ministerial a kana último añanan i a proponé na su koleganan minister presente pa tin mas interakshon i kombersashon stratégiko entre e ministernan. Kombersashon i deliberashonnan ku ta enfoká tambe riba kambio i adaptashonnan den enseñansa, desafionan struktural den enseñansa, desaroyo di kapital humano, inovashon i futuro sosioekonómiko di nos paisnan. Alabes minister van Heydoorn a sostené e proposishon di minister Croes di Aruba pa representantenan di BES bira parti struktural di e konsultá.

Finalmente minister van Heydoorn a gradisí e minister di St. Maarten Melissa Gumbs, pa nan hospitalidat i e tremendo konferensia. E siguiente enkuentro entre ministernan di Reino ta planea pa tuma lugá, den e promé kuartal di 2027.

Ministerio di Enseñansa, Siensia, Kultura i Deporte (OWCS)

Kòrsou