Rumbo pa un vishon di mobilidat integral pa Kòrsou - Informashon tokante Gobièrnu di Kòrsou

Notisia

Tráfiko, Transporte i Planifikashon Urbano
 

Rumbo pa un vishon di mobilidat integral pa Kòrsou

Publiká riba 19 Novèmber 2026

WILLEMSTAD – Ministerio di Tráfiko, Transporte i Planifikashon Urbano (VVRP), huntu ku e kompania ingeniero di renombre internashonal Movares, a organisá un seshon stratégiko den kuadro di desaroyo di un Vishon di Mobilidat pa Kòrsou. Esaki a tuma lugá den e siman di 9 te ku 13 di novèmber 2026,

 

Durante e seshonnan aki, huntu ku diferente partido envolví, a trata e retonan aktual di mobilidat, retonan di futuro i ambishonnan pa mihó aksesibilidat i mobilidat riba nos isla. A traha riba

un mihó komprendementu di tendensia, desaroyo i reto ku Kòrsou ta enfrentá den área di mobilidat.

Den esaki, tres tema importante tabata sentral: aksesibilidat, seguridat di tráfiko, i kalidat di bida.

Durante e diferente enkuentronan, a diskutí direkshon di maneho i posibel senarionan pa futuro. Basá riba ehèmpelnan práktiko, a analisá impakto ku desaroyonan eksistente tin riba mobilidat.

A mustra ku solushon di mobilidat no por konsentrá riba mas infrastruktura so, pero mester konsidera kambionan fundamental manero miho alokashon di fasilidatnan, maneranan inovativo pa traha (‘thuiswerken’), posibel kambio di orario di skol i/òf trabou, mihó transporte públiko, transporte alternativo (ku baiskel òf na pia)) i mester tene kuenta riba sostenibilidat di esaki.

 

Ku yudansa di diferente método interaktivo, inkluyendo un “serious game”, e partisipantenan a haña oportunidat pa mira e retonan di mobilidat na Kòrsou for di diferente perspektiva. Despues, a kompartí i diskutí konosementu, eksperensia i resultado durante un seshon plenario.

 

Huntu trahando pa un mobilidat sostenibel

VVRP ta enfatisá ku un Vishon di Mobilidat ku ta wak pa futuro por wòrdú realisá solamente a traves di koperashon i kompromiso di komunidat. Mobilidat no ta trata solamente tráfiko i transporte, pero ta interkonektá ku riba desaroyo di tereno, aktividatnan ekonómiko, seguridat di tráfiko i kalidat di bida na Kòrsou.

Resultadonan di e seshonnan di strategia ta forma un aporte pa e siguiente etapa den desaroyo di e Vishon.

VVRP ta ekspresá su apresio pa e partisipashon, kompromiso i kontribushon balioso di tur e partisipantenan i ‘stakeholders’ ku a forma parti di e seshonnan aki.

Huntu nos ta traha pa un Kòrsou aksesibel, sigur i duradero.