Kòrsou, den su maneho di eventual aseptá hende, den e kaso aki Venezolano, komo refugiado, ta usa netamente e definishon di UNHCR. Gobièrnu di Kòrsou tin tur komprenshon pa e tempunan difísil ku Venezuela ta pasa aden na e momento aki, pero te ainda no a konstatá ku den e grupo di Venezolano ta tin hende ku por kalifiká komo refugiado. Pues, no a topa ku niun Venozolano ainda, ku a sali for di su pais i a pidi pa un estadia a base di peliger di persiguishon, a base di rasa, religion, kerensianan polítiko òf miembresia di un sierto grupo. Si tin personanan ku ta den e prosedura ainda pa por disidí si e ta refugiado.
