Publiká riba 28 Febrüari 2025
Desishonnan relashoná spesífikamente ku asuntunan di pais riba nivel nashonal di djárason, 26 di febrüari 2025:
1. Konseho riba e plan di akshon pa e proyekto “Sistema nobo di finansiamentu pa Enseñansa na Kòrsou” (Minister di Enseñansa, Siensia, Kultura i Deporte)
Konseho di Minister a aprobá e plan di akshon pa e proyekto “Sistema Nobo di Finansiamentu di Enseñansa Kòrsou”. A tuma e desishon akí a base di e formulario di evaluashon di Presidente di Komishon Nashonal di Reforma Kòrsou (Nationale Hervormingscommissie Curaçao) di 4 di febrüari 2024 i e petishon di Minister di Enseñansa, Siensia, Kultura i Deporte (OWCS) di 18 di febrüari 2025.
2. Konseho riba e Memorando di Entendimiento (MoU) den konsepto entre e entidat hurídiko públiko Kòrsou i Fekoskan (Minister di Desaroyo Ekonómiko i Minister di Asuntunan General)
Konseho di Minister a aprobá e konsepto modifiká di e Memorando di Entendimiento (MoU) entre e entidat hurídiko públiko Kòrsou i e Kooperativa Fekoskan. Meta di e MoU akí ta pa fortalesé koperashon entre ámbos partido pa promové kresementu ekonómiko, sostenibilidat i logro di e Metanan di Desaroyo Sostenibel (SDGs) na Kòrsou.
Banda di esaki, Konseho di Minister a outorisá Minister di Asuntunan General (AZ) i Minister di Desaroyo Ekonómiko (EO) pa firma e MoU na nòmber di e entidat hurídiko públiko Kòrsou. A tuma e desishon akí a base di konseho di e Direktor di Direktorado di Lei i Asuntunan Hurídiko di 10 di febrüari 2025 i e petishon di Minister di Desaroyo Ekonómiko di 21 di febrüari 2025.
Ademas, Konseho di Minister tambe a bai di akuerdo pa entregá e dekreto di apoderashon na Gobernador pa firma.
3. Presentashon di e reglanan di prosedura pa e Komishon di Hür 2025 (Minister di Maneho di Gobernashon, Planifikashon i Servisio Públiko)
Konseho di Minister a tuma nota di e dokumento “Reglanan di prosedura pa e Komishon di Hür 2025” di 21 di febrüari 2025 entregá pa Minister di Maneho di Gobernashon, Planifikashon i Servisio Públiko.
