Publiká riba 11 Ougùstùs 2023
1. Petishon pa un instrukshon provishonal na Minister Plenipontensiario di dia 13 di yüli 2023 ku tin di haber ku e rapòrt adishonal tokante tres proposishon di lei relashoná ku Infrastruktura i Maneho di Awa (Minister di Asuntunan General)
Konseho di Minister ta bai di akuerdo ku registrashon di e desishon ku ya a keda tumá dia 12 di yüli 2023 dor di Konseho di Minister di Reino. E desishon akí ta relashoná ku un instrukshon na Minister Plenipotensiario pa ku e reunion di Konseho di Minister di Reino riba 14 di yüli 2023. Den e instrukshon akí ta stipulá ku Konseho di Minister ta aseptá e rapòrt adishonal i ta di akuerdo pa no entregá tres proposishon di lei na Tweede Kamer, Parlamento di Aruba, Parlamento di Curaçao i Parlamento di Sint Maarten. Esaki ta konforme konseho di Direktor di Lei i Asuntunan Hurídiko di dia 11 di yüli 2023.
2. Plan di dia 5 di yüli 2023 pa un akuerdo entre Pais Kòrsou i Fundashon Un Mihó Opshon (FUMO) tokante maneho, mantenshon i uso di un tereno na Montaña Abou pa deporte i rekreashon (Minister di Enseñansa, Siensia, Kultura i Deporte)
Konseho di Minister ta bai di akuerdo ku e siguiente puntonan:
1. Kontenido di e akuerdo den konsepto anekso entre Kòrsou i Fundashon Un Mihó Opshon (FUMO), pa manehá e tereno na Montaña Abou pa deporte i rekreashon.
2. Minister di Enseñansa, Siensia, Kultura i Deporte ta haña outorisashon pa firma e konsepto di akuerdo menshoná aki na nòmber di Kòrsou.
Esaki ta basá riba proposishon di Minister di Enseñansa, Siensia, Kultura i Deporte di dia 5 di yüli 2023. Konseho di Minister ta di akuerdo tambe pa ofresé e dekreto nashonal den konsepto na Gobernador pa keda firmá.
3. Plan di dia 28 di yüni 2023 pa un akuerdo ku Proteus Ocean Group, LTD i instalashon di un grupo di trabou pa e proyekto Proteus (Minister di Desaroyo Ekonómiko)
Kosneho di Minister ta bai di akuerdo ku e siguiente puntonan:
1. E desishon ku ya a keda tumá dia 18 di mei 2023 ta ser registrá. Den esaki ta stipulá ku Minister di Desaroyo Ekonómiko ta duna outorisashon pa, na nòmber di Kòrsou, firma un akuerdo di kolaborashon, un Memorando di Entendimiento (MoU). E MoU akí ta relashoná ku konstrukshon di un fasilidat bou di awa ku yama “Proteus” den awanan rondó di Kòrsou, huntu ku Proteus Ocean Group, LTD.
2. Di akuerdo ku kontenido di e dekreto nashonal den konsepto anekso pa instalá un grupo di trabou pa e proyekto Proteus. E dekreto nashonal akí ta ser ofresé na Gobernador pa firmamentu.
Esaki ta basá riba proposishon di Minister di Desaroyo Ekonómiko di dia 23 di yüni 2023.
4. Petishon pa splikashon di parti di Ministerio di Desaroyo Sosial, Labor i Bienestar tokante e rapòrt di ILO pa aña 2023 – Memo di dia 4 di ougùstùs 2023 (Minister di Desaroyo Sosial, Labor i Bienestar)
Konseho di Minister ta bai di akuerdo ku loke ta skibí den e rapòrt di ILO 2023 pa Kòrsou. Ora Promé Minister firma e rapòrt, e dokumentu lo ser mandá pa Direktor di ‘ILO Norms and Standards Department’. Esaki lo tuma lugá konforme kontenido di e memo di dia 4 di ougùstùs 2023 ku a formulá na nòmber di e Organisashon di Maneho di Ministerio di Desaroyo Sosial, Labor i Bienestar.
