Publiká riba 03 Novèmber 2023
Desishonnan relashoná spesífikamente ku asuntunan di pais riba nivel nashonal di djárason, 1 di novèmber 2023:
1. Konseho tokante apertura di vakaturanan finansiero ‘batch-2’ (Minister di Finansa)
Konseho di Minister a bai di akuerdo ku e siguiente desishonnan:
a. Lo habri 44 vakatura pa reforsá departamentonan finansiero. Ta bai hasi esaki ku e meta pa atendé ku problemanan menshoná den e kartanan di maneho i tambe pa mehorá gestion finansiero. Lo sòru pa tin sufisiente fondo asigná den presupuesto pa aña 2024 i e añanan ku ta sigui p’asina finansiá e vakaturanan akí.
b. Ta bai añadí e 44 vakaturanan nobo na e 12 vakaturanan ya aprobá pa kada ministerio i e 42 vakaturanan ku anteriormente a keda aprobá durante di un ‘raadsbesluit’ riba 12 di yüli 2023.
c. Kandidatonan interno ku a finalisá un estudio di 4 aña HBO-Bachelor na un ‘Hogeschool’ òf un estudio di 3 aña riba nivel Bachelor na un Universidat, por solisitá riba un di e vakaturanan ku ta pidi pa un estudio riba nivel akadémiko.
E desishon akí a keda tumá riba rekomendashon i konseho di Direktor di Sektor di Maneho Finansiero i Maneho di Presupuesto. E rekomendashon a keda entregá pa Minister di Finansa suplente i a keda evaluá tambe pa Direktor suplente di Organisashon di Maneho di Rekurso Humano (HRO) / Lider di proyekto Tim Mobilidat.
2. Karta tokante di selebrashon, ‘vouchers’ i paketenan di Pasku 2023 (Minister di Finansa)
Konseho di Minister a tuma nota di e karta ku Minister di Finansa a manda dia 19 di òktober 2023 tokante selebrashon, ‘vouchers’ i paketenan di Pasku pa aña 2023. Konseho a disidí ku si resultá ku den e ministerionan no tin sufisiente rekurso finansiero den presupuesto despues ku nan tene nan propio kontrol finansiero, e minister konserní por hasi un petishon via di direktor finansiero na Ministerio di Finansa. E petishon akí ta destiná pa kubri gastunan di selebrashon, voucher òf paketenan di Pasku for di e fondo presupuestario ‘onvoorzien’.
3. Proposishon pa deklará e Kombenio di ILO tokante Seguridat, Salú i Ambiente Laboral no aplikabel (Minister di Desaroyo Sosial, Labor i Bienestar)
Konseho di Minister a tuma e desishon pa deklará e Kombenio di ILO nr.155 (Trb.1981, 243 i Trb. 1982, 100) tokante e kuadro promoshonal pa seguridat, salú i ambiente laboral temporalmente no aplikabel. E desishon akí ta basá riba rekomendashon di Minister di Desaroyo Sosial, Labor i Bienestar i ta konforme e desishon di Konseho di Minister di 21 di yüli 2023.
4. Proposishon pa deklará e Kombenio di ILO tokante Seguridat i Salú na boka di trabou no aplikabel (Minister di Desaroyo Sosial, Labor i Bienestar)
Konseho di Minister a tuma e desishon pa deklará e Kombenio di ILO nr.187 (Trb.2011, 229 i Trb. 2022, 84) tokante e kuadro promoshonal pa siguridat i salú na boka di trabou temporalmente no aplikabel. E desishon akí ta basá riba rekomendashon di Minister di Desaroyo Sosial, Labor i Bienestar i a keda ratifiká pa Konseho di Minister riba 21 di yüli 2023.
5. Proposishon pa deklará Tratadonan di ILO aplikabel (Minister di Desaroyo Sosial, Labor i Bienestar)
Konseho di Minister a bai di akuerdo pa deklará e Tratado di ILO nr. 98 tokante derechi di organisashon i negoshashon i e Tratado di ILO nr. 138 tokante edat mínimo pa laborá, aplikabel. Próksimamente lo bini apoyo profeshonal pa inventarisá i si ta nesesario adaptá
leinan lokal relashoná ku e tratadonan akí. E desishon akí ta konforme rekomendashon di Minister di Desaroyo Sosial, Labor i Bienestar.
6. Petishon pa ratifikashon di Tratado di ekstradishon Hulanda – Emiratonan Árabe Uní (Minister di Hustisia)
Konseho di Minister a duna su aprobashon pa kuminsá ku ratifikashon di e tratado di ekstradishon entre Hulanda i Emiratonan Árabe Uní tokante ekstradishon (Abu Dhabi, 29-08-2021). E proposishon akí a keda hasí pa Direktorado di Relashonnan Eksterior manera a proponé riba 18 di sèptèmber 2023 pa Minister di Hustisia.
7. Proposishon pa aprobashon relashoná ku ratifikashon di e Tratado pa asistensia hurídiko mutuo den kasonan penal entre Hulanda i Emiratonan Árabe Uní (Minister di Hustisia)
Konseho di Minister a duna aprobashon pa kuminsá ku e proseso pa ratifiká un tratado entre Hulanda i Emiratonan Árabe Uní tokante asistensia hurídiko mutuo den kasonan penal. E proseso lo ta implementá pa Direktorado di Relashonnan Eksterno (DBB) i lo sigui e proposishon di 18 di sèptèmber 2023 di Minister di Hustisia.
8. Proposishon pa aprobashon di e protokòl kontra produkshon i komèrsio ilegal di arma komo komplemento riba e tratado di Nashonnan Uní kontra krímen organisá ku ta krusa frontera (Minister di Hustisia)
Konseho di Minister ta bai di akuerdo ku e siguiente puntonan:
a. Kòrsou lo aprobá e Protokòl kontra produkshon i komèrsio ilegal di arma komo komplemento riba e tratado di Nashonnan Uní kontra krímen organisá ku ta krusa frontera.
b. KPC/UBW lo keda asigná komo e outoridatnan sentral di Protokòl;
c. Direktorado di Relashonnan Eksterior (DBB) lo start ku e proseso di ratifikashon pa e Protokòl akí.
E desishon akí ta sigui e proposishon di Minister di Hustisia di 28 di ougùstùs 2023.
9. Proposishon pa ratifikashon di Protokòl di Nashonnan Uní kontra produkshon ilegal di arma, ku konseho di Direktorado di Lei i Asuntunan Hurídiko (WJZ) (Minister di Hustisia)
Konseho di Minister ta bai di akuerdo ku ratifikashon di Protokòl di Nashonnan Uní kontra produkshon ilegal di arma, ku konseho di Direktorado di Lei i Asuntunan Hurídiko.
10. Notifikashon biahenan di trabou i privá di ministernan na Parlamento(Minister di Asuntunan General)
Konseho di Minister a tuma nota i aseptá e karta di Minister di Asuntunan General riba 30 di òktober 2023, tokante di biahenan di trabou i privá di ministernan manera ta deskribí den e karta di Sekretario di Konseho di Minister (RvM) di 23 di òktober na Griffier di Parlamento pa keda tratá despues.
11. Proposishon di dia 12 di òktober 2023 tokante revishon di impuesto 2024 (Minister di Finansa)
Konseho di Minister a bai di akuerdo ku e proposishon di 12 di òktober 2023 tokante revishon di impuesto pa aña 2024. Direktorado di Lei i Asuntunan Hurídiko (WJZ) lo evaluá i duna konseho tokante di e proposishon akí.
12. Proposishon tokante aprobashon di Tratado Malta – Kòrsou pa prevenshon di dòbel impuesto (Minister di Finansa)
Konseho di Minister a bai di akuerdo pa aprobá kontenido di e dokumentu ku ta reakshoná riba opservashonnan di Parlamento di Kòrsou tokante di proposishon di un lei pa e tratado entre Reino Hulandes, na nòmber di Kòrsou i Repúblika di Malta tokante dòbel impuesto. E tratado akí tin komo meta pa prevení evashon di impuesto. A firma e akuerdo akí riba 18 di novèmber 2015 (Verdragsbladen 2015, number 196 i 2016, number 124). E desishon akí ta konforme proposishon di Minister di Finansa, manera a keda proponé riba 24 di òktober 2023, teniendo na kuenta ku un mensahe via e-mail di Direktor di Direktorado pa Relashonnan Eksterior (DBB) di dia 1 di novèmber 2023.
13. Konseho pa vakatura di ‘Senior Jurist’ na Outoridat di Aviashon Sivil di Kòrsou (Minister di Maneho di Gobernashon, Planifikashon i Servisio Públiko)
Konseho di Minister ta bai di akuerdo pa habri un vakatura pa e funshon ‘Senior Jurist’ na Outoridat di Aviashon Sivil di Kòrsou (CBA). E petishon akí ta bini di Minister di Tráfiko, Transporte i Planifikashon Urbano (VVRP) i ta basá riba konseho di Direktor suplente di Organisashon di Maneho di Rekurso Humano / Lider di proyekto Tim Mobilidat di 9 di òktober 2023.
