Publiká riba 13 Sèptèmber 2024
Desishonnan relashoná spesífikamente ku asuntunan di pais riba nivel nashonal di djárason, 11 di sèptèmber 2024:
1. Proposishon pa firma e ‘addendum bestuursakkoord LTP Kustwacht Karibean 2019-2028’ (Minister di Hustisia)
Konseho di Minister a duna akuerdo pa ahustá desishon 2 di e seri di desishonnan ku konseho a tuma riba 24 di aprel 2024. E punto di desishon nobo ta determiná ku Minister di Hustisia ta outorisá pa firma e ‘addendum’ den konsepto, manera menshoná den desishon 1, na nòmber di e Gobièrnu di Kòrsou. E desishon akí a basá riba konseho di e Direktor di Sektor di Maneho Finansiero i Maneho di Presupuesto, i proposishon di e Minister di Hustisia.
2. Proposishon pa e dokumento ‘Maneho Nashonal kontra Trafikashon di Hende 2024-2026′ (Minister di Hustisia)
Konseho di Minister a bai di akuerdo ku e dokumento tokante maneho nashonal kontra trafikashon di hende pa e periodo 2024-2026. A tuma e desishon akí a base di e petishon di Minister di Hustisia. Minister di Hustisia ta responsabel pa kordinashon di e trayekto ku ta sigui.
3. Konseho tokante ampliashon di Sekretaria di e Plataforma pa Kambio di Klima Kòrsou (Minister di Asuntunan General/Minister di Tráfiko, Transporte i Planifikashon Urbano)
Konseho di Minister ta di akuerdo ku kontenido di e dekreto nashonal den konsepto. Intenshon ta pa ahustá e dektreto nashonal di e Plataforma pa Kambio di Klima Kòrsou, di forma ku por sigurá partisipashon di Ministerio di Asuntunan General. A tuma e desishon akí a base di konseho di e Direktor di e Servisio Meteorológiko. Konseho di Minister alabes a aprobá pa presentá e dekreto nashonal den konsepto na Gobernador pa firma.
