Publiká riba 19 Desèmber 2025
Desishonnan relashoná spesífikamente ku asuntunan di pais riba nivel nashonal di djárason, 17 di desèmber 2025:
1. Reinisio di e programa Future Proof Organization (FPO) (Ministerio di Maneho di Gobernashon, Planifikashon i Servisio Públiko)
Konseho di Minister a aprobá reinisio di e programa Future Proof Organization (FPO) ku e meta pa modernisá i fortifiká e aparato públiko. E Sekretarionan General di e Ministerionan di Maneho di Gobernashon, Planifikashon i Servisio Públiko i tambe Finansa lo prepará un proposishon nobo pa e proyekto inkluso plan di ehekushon, i lo informá tokante e progreso tur kuartal. E Konsulta di Sekretarionan General lo wòrdu designá komo e komishon di direkshon.
2. Interkambio di tereno ku doñonan di Kranshi Bieu Estate (Ministerio di Tráfiko, Transporte i Planifikashon Urbano)
Konseho di Minister a aprobá un interkambio di tereno den konsepto entre Pais Kòrsou i doñonan di Kranshi Bieu Estate na Otrobanda. E interkambio ta enserá terenonan chikitu. E Minister di Tráfiko, Transporte i Planifikashon Urbano òf e direktor/direktor interino di Domeinbeheer por firma e akuerdo i akta notarial na nòmber di Pais.
3. Regulashon pa pèrmit pa artistanan di afó durante temporada di fiesta (Ministerio di Hustisia & Ministerio di Desaroyo Sosial, Labor i Bienestar)
Konseho di Minister a aprobá pa konhuntamente stipulá un areglo ministerial ku ta enserá dunamentu di pèrmit na artistanan di afó ku aktuashon entre promé di desèmber 2025 i e promé djarason despues di e parada di Karnaval di 2026. E areglo ta basá riba artíkulo 47 di e Ordenansa Nashonal di Órden Públiko.
