Desishonnan di djárason 18 di sèptèmber 2024

Desishonnan relashoná spesífikamente ku asuntunan di pais riba nivel nashonal di djárason, 18 di sèptèmber 2024:

1. Aprobashon di dos moshon dor di Parlamento durante e reunion públiko di dia 21 di ougùstùs 2024 tokante resultado di e enkuesta parlamentario riba konstrushon di un hòspital nobo (HNO) na Otrobanda (Minister di Finansa)

Konseho di Minister a tuma nota di e dos moshonnan ku a keda aprobá pa Parlamento durante di e reunion públiko di dia 21 di ougùstùs 2024. E moshonnan ta relashoná ku e konklushonnan di e enkuesta parlamentario tokante konstrushon di e hòspital HNO. Konseho di Minister ta pidi Minister di Finansa pa tuma e moshon kaminda ta pidi pa kuminsá ku e tráhe pa kambia e leinan di kompabilidat i e leinan tokante maneho finansiero den konsiderashon.

2. Konseho di Direktor di Direktorado di Relashonnan Eksterior tokante e ‘List of Issues’ di e di 7 rapòrt periódiko di Reino Hulandes tokante e Tratado relashoná ku Derechinan Ekonómiko, Sosial i Kultural (ESOCUL) (Minister di Asuntunan General)

Konseho di Ministernan ta di akuerdo ku e kontribushon di Kòrsou na e ‘List of Issues’ di e di 7 rapòrt periódiko di Reino Hulandes tokante e Tratado relashoná ku Derechinan Ekonómiko, Sosial i Kultural (ESOCUL). E desishon akí ta basá riba konseho di e Direktor di Direktorado di Relashonnan Eksterior (DBB).

3. Proposishon pa ratifikashon di e Tratado di Konseho Oropeo tokante labamentu di plaka, investigashon i konfiskashon di e.o. entradanan pa medio di aktonan kriminal i finansiamentu di terorismo, Warschau, 16 di mei 2005 (Minister di Hustisia)

Konseho di Minister ta di akuerdo ku e siguiente puntonan di desishon:

1. Ku Pais Kòrsou ta haña aprobashon pa partisipá den e Tratado di Konseho Oropeo tokante labamentu di plaka, investigashon i konfiskashon di e.o. entradanan pa medio di aktonan kriminal i finansiamentu di terorismo, Warschau, 16 di mei 2005;
2. Pa apuntá e ‘Financial Intelligence Unit’ (FIU) komo instansia segun artíkulo 46, insiso 13, di e tratado;
3. Pa apuntá e Sentro di Ayudo Internashonal (IRC) di e Parkèt di Prokurador General di Ministerio Públiko (OM) komo instansia segun artíkulo 33, insiso 2, di e tratado;
4. Pa Pais Kòrsou tuma over òf uni na e reserva (voorbehoud) ku a hasi na nòmber di Reino;
5. Pa Direktorado di Relashonnan Eksterior kuminsá ku e proseso di ratifikashon di e tratado.

Tur e desishonnan akí ta den akuerdo ku proposishon di Minister di Hustisia.

MAS NOTISIA