Desishonnan di djárason 19 di mart 2025

Desishonnan relashoná spesífikamente ku asuntunan di pais riba nivel nashonal di djárason, 19 di mart 2025:

1. Kombenio di kolaborashon entre Aruba, Boneiru i Kòrsou pa desaroyo i promoshon di Papiamento i Papiamentu (Minister di Enseñansa, Siensia, Kultura i Deporte)

Konseho di Minister a bai di akuerdo ku e siguiente puntonan:

1. Aprobashon di kontenido di e akuerdo di kolaborashon den konsepto entre Aruba, Boneiru i Kòrsou pa desaroyo i promoshon di e idiomanan Papiamento i Papiamentu.
2. Minister di Enseñansa, Siensia, Kultura i Deporte ta outorisá pa firma e akuerdo akí na nòmber di Kòrsou.

A tuma e desishon akí a base di e petishon di Minister di Enseñansa, Siensia, Kultura i Deporte di 10 di mart 2025. Ademas a duna aprobashon pa entregá e dekreto nashonal den konsepto na Gobernador pa firma.

---

2. Petishon pa un akuerdo di maneho 2025-2028 ku Fundashon Marshe (Minister di Desaroyo Ekonómiko)

Konseho di Minister a bai di akuerdo ku e siguiente desishonnan:

1. Aprobashon di kontenido di e akuerdo di maneho 2025-2028 den konsepto ku Fundashon Marshe.
2. Minister di Desaroyo Ekonómiko ta outorisá pa firma e akuerdo akí na nòmber di Kòrsou.

A tuma e desishonnan akí a base di e petishon di Minister di Desaroyo Ekonómiko di 12 di mart 2025. Ademas a duna aprobashon pa entregá e dekreto nashonal den konsepto na Gobernador pa firma.

---

3. Petishon pa un akuerdo di maneho 2025-2028 ku Fair Trade Authority Curacao (FTAC) (Minister di Desaroyo Ekonómiko)

Konseho di Minister a bai di akuerdo ku e siguiente puntonan:

1. Aprobashon di kontenido di e akuerdo di maneho 2025-2028 den konsepto ku Fair Trade Authority Curaçao (FTAC).
2. Minister di Desaroyo Ekonómiko ta outorisá pa firma e akuerdo akí na nòmber di Kòrsou.

A tuma e desishon akí a base di e petishon di Minister di Desaroyo Ekonómiko di 11 di mart 2025. Ademas a aprobá pa entregá e dekreto nashonal den konsepto na Gobernador pa firma.

---

4. Petishon pa ekstenshon di durashon di e ‘Werkgroep Ontwikkeling Peninsula Caracasbaai’ (Minister di Desaroyo Ekonómiko)

Konseho di Minister a bai di akuerdo ku e siguiente puntonan:

1. Ta prolongá e ‘Werkgroep Ontwikkeling Peninsula Caracasbaai’ ku un aña.
2. E grupo di trabou tin e tarea pa traha un plan i strategia di desaroyo pa Peninsula Caracasbaai denter di e periodo akí, basá riba e dokumento di vishon ‘’Peninsula Caracasbaai Development Vision – yüli 2022”.

A tuma e desishon akí a base di e petishon di Minister di Desaroyo Ekonómiko di 11 di mart 2025.

---

5. Petishon pa lanta un grupo di trabou riba desaroyo di Stadion di Rif (Minister di Desaroyo Ekonómiko)

Konseho di Minister a disidí pa lanta un grupo di trabou pa desaroyo di Stadion di Rif. E dekreto nashonal den konsepto pa lantamentu di e grupo di trabou akí a keda aprobá i entregá na Gobernador pa firma, di akuerdo ku e petishon di Minister di Desaroyo Ekonómiko fechá 11 di mart 2025.