Publiká riba 23 Yanüari 2026
Desishonnan relashoná spesífikamente ku asuntunan di pais riba nivel nashonal di djárason, 21 di yanüari 2026:
1. Ahuste di alokashon di kartera i traspaso di tareanan (Ministerio di Asuntunan General)
Konseho di Minister a aprobá ahustenan na e alokashon di kartera pa 2025. Ahuste den e repartishon nobo di kartera lo keda tratá hurídikamente i publiká asina ku a kompletá e proseso.
2. Konseho temporal tokante kompensashon di direktor- i komisarionan (Ministerio di Finansa)
Konseho di Minister a aprobá e enkargo temporal (di tres luna) di Stichting Bureau Toezicht en Normering Overheidsentiteiten (SBTNO), den kuadro di duna konseho riba kompensashon di direktor- i komisarionan di entidatnan di gobièrnu. Ta entregá e dekreto nashonal den konsepto na Gobernador pa firma.
3. Kontesta riba e kuenta anual 2023 di Kòrsou (Ministerio di Finansa)
Konseho di Minister a aprobá e desishon dokumentá tokante kontenido di e karta di Minister di Finansa na Kontroleria General di Kòrsou, kaminda ta duna kontesta riba e relato final di e kuentanan anual 2023 di Pais Kòrsou. Un kopia di e karta ta bai pa Parlamento.
4. Nombramentu di Vise Promé Minister (Ministerio di Asuntunan General)
Konseho di Minister a aprobá nombramentu di sr. Shalten Hato komo Vise Promé Minister i sr. Charles Cooper komo Segundo Vise Promé Minister, entrante 21 di yanüari 2026. Ta presentá e dekretonan na Gobernador pa firma.
5. Pago di un solo biaha di CG 800 na personal di institutonan supsidiá (Ministerio di Finansa)
Konseho di Minister a aprobá un pago di un solo biaha di CG 800 (bruto) na personal di institutonan supsidiá denter di tur ministerio. Lo hasi un ahuste den e presupuesto, pendiente aprobashon di Parlamento.
6. Pago di “Prima di Apresio” na benefisiarionan (Ministerio di Desaroyo Sosial, Labor i Bienestar)
Konseho di Minister a aprobá e desishon dokumentá pa loke ta trata pago di un solo biaha di e “Prima di Apresio” na komienso di yanüari. Esnan ku ta haña asistensia sosial lo risibí CG 200, i esnan ku ta risibí penshun di biuda i huérfano lo risibí CG 400. Ta bai hasi un ahuste di e presupuesto pa esaki.
