Desishonnan di djárason 22 di yanüari 2025

Desishonnan relashoná spesífikamente ku asuntunan di pais riba nivel nashonal di djárason, 22 di yanüari 2025:

1. Petishon pa modifikashon di e Lei pa organisashon di maneho públiko (Minister di Hustisia)

Konseho di Minister ta bai di akuerdo ku kontenido di e lei den konsepto den kuadro di modifikashon di e lei pa organisashon di maneho públiko. E petishon akí ta
keda presentá via di Gobernador na Staten pa tratamentu manera proponé pa Minister di Hustisia riba 7 di yanüari 2025.

---

2. Petishon tokante sirkulario “Toekenning bezoldigingstrede per januari 2025”
(Minister di Maneho di Gobernashon, Planifikashon i Servisio Públiko)

Konseho di Minister ta bai di akuerdo ku e desishon tumá anteriormente riba 8 di yanüari 2025. E desishon akí ta kontené aprobashon di e sirkulario di e mes un fecha, ku e tema: “Toekenning bezoldigingstrede per januari 2025”. Esaki ta di akuerdo ku e petishon di 20 di yanüari 2025 di Minister di Maneho di Gobernashon, Planifikashon i Servisio Públiko.

---

3. Konseho tokante salarionan indeksá pa yanüari 2025 (Minister di Maneho di Gobernashon, Planifikashon i Servisio Publiko)

Konseho di Minister a duna aprobashon riba 8 di yanüari 2025 pa determinashon di e salarionan indeksá pa 1 di yanüari 2025. Ta trata aki di un total di 12 tabèl ku skalnan salarial, manera ta inkluí den e aneksonan di e konseho di Direktor interino di e Organisashon di Maneho di Rekursonan Humano i Organisashon (HRO) fechá 4 di yanüari 2025. E tabèlnan ta relashoná ku:

• Skalnan general segun e dekreto nashonal salarial di 1998;
• Salario i kompensashon di outoridatnan polítiko;
• Salario di bomberonan ku ta traha warda;
• Skalnan pa trahadónan den servisio militar obligatorio;
• Skalnan pa trahadónan di Fundashon Kuido di Ámbulans;
• Salario pa religiosonan;
• Salario pa trahadónan di Sentro Korekshonal (Prizòn);
• Skalnan salarial pa ámtenarnan uniformá di Wardakosta;
• Skalnan salarial pa personal di Polis;
• Skalnan pa trahadónan di ‘Veiligheidsdienst Curaçao (VDC);
• Skalnan salarial segun reglamentu di salario pa personal di edukashon.

E determinashon akí ta basá riba konseho di e Direktor interino di e Organisashon di Maneho di Rekursonan Humano i Organisashon fechá 4 di yanüari 2025 i e petishon di Minister di Maneho di Gobernashon, Planifikashon i Servisio Públiko fechá 20 di yanüari 2025.

---

4. Petishon tokante e sirkulario “Toekenning ‘Bashi Premie’ yanüari 2025” (Minister di Maneho di Gobernashon, Planifikashon i Servisio Públiko)

Konseho di Minister a bai di akuerdo riba 22 di yanüari 2025, ku e sirkulario di 6 di yanüari 2025 ku tin komo tema “Toekenning ‘Bashi Premie’ in de maand januari 2025”. E desishon akí ta tumá a base di e petishon di 20 di yanüari 2025 di Minister di Maneho di Gobernashon, Planifikashon i Servisio Públiko.

---

5. Korekshon di skalnan salarial pa kuerpo Polisial 2013-2025 (vershon yanüari 2025) (Minister di Maneho di Gobernashon, Planifikashon i Servisio Públiko)

Konseho di Minister a bai di akuerdo riba 22 di yanüari 2025 ku e siguiente desishonnan:

• Determinashon di skalnan salarial pa Kuerpo Polisial 2013-2025 aneksá (vershon yanüari 2025)
• Remplaso di e skalnan salarial di Kuerpo Polisial 2013-2025 (vershon desèmber 2024) anteriormente determiná, pa e vershon nobo di yanüari 2025.
  

E desishon akí ta tumá a base di e petishon di Minister di Maneho di Gobernashon, Planifikashon i Servisio Públiko, fechá 20 di yanüari 2025.

---

6. Petishon pa akuerdo di maneho entre Pais i Asosiashon Akademia di Baseball Jandoret (Minister di Enseñansa, Siensia, Kultura i Deporte)

Konseho di Minister a bai di akuerdo ku e siguiente puntonan di desishon:

• Kontenido di e akuerdo di maneho-konseptual entre Pais Kòrsou i Asosiashon Akademia di Baseball Jandoret pa e maneho, mantenshon i eksplotashon di e tereno pa propósitonan rekreativo i deportivo na Jandoret (Groot Piscadera);
• Ta duna Minister di Enseñansa, Siensia, Kultura i Deporte (OWCS) outorisashon pa, huntu ku Minister di Tráfiko, Transporte i Planifikashon Urbano (VVRP), firma e akuerdo di maneho-konseptual na nòmber di entidat hurídiko Kòrsou.
  

Tur esaki ta di akuerdo ku petishon di Minister di OWCS fechá 3 di desèmber 2024.
Ademas tin un akuerdo ku presentashon di e dekreto nashonal konseptual na Gobernador pa firma.

---

7. Petishon pa un pago pa un solo biaha di un “bashi-bonus” di NAf 350,- únikamente pa benefisiarionan di AOV- i AWW ku un entrada bruto entre Naf 1100,- i 1400,- (Minister di Desaroyo Sosial, Labor i Bienestar)

Konseho di Minister a disidí riba 17 di yanüari 2025 pa bai di akuerdo ku pago pa un solo biaha di un gratifikashon yamá “bashi-bonus” di NAf 350,-. E bonus aki ta destiná pa benefisiarionan di AOV i AWW ku ta biba na Kòrsou i ku tin un entrada bruto entre NAf 1100,- i 1400,-. E desishon akí ta tumá a base di un petishon di Minister di Desaroyo Sosial, Labor i Bienestar a.i riba 16 di yanüari 2025 i e konseho di stèmpel di Direktor di Sektor di Maneho Finansiero i Maneho di Presupuesto di 17 di yanüari 2025.

---

8. Petishon pa otorgá supsidio na internat i kasnan di grandi pa 2025
(Minister di Desaroyo Sosial, Labor i Bienestar)

Konseho di Minister ta bai di akuerdo ku otorgamentu di supsidio na internatnan i kasnan di grandi, meskos ku montantenan di supsidio manera indiká den e tabèl aneksá dia 21 di yanüari 2025.