Publiká riba 02 Yüni 2025
Desishonnan relashoná spesífikamente ku asuntunan di pais riba nivel nashonal di djárason, 28 di mei 2025:
1. Lantamentu di un Grupo di Trabou pa e Proyekto CSA (Minister di Desaroyo Ekonómiko)
Konseho di Minister a aprobá e kontenido i presentashon di konsepto di e dekreto nashonal modifiká pa instituí un Grupo di Trabou pa e proyekto di Caribbean Sustainable Aquaculture (CSA). E dekreto nashonal ta wòrdu presentá na Gobernador pa firma. A tuma e desishon akí a base di e petishon di 3 di mei 2025 dor di Minister di Desaroyo Ekonómiko (EO).
2. Presentashon di e Plan di Desaroyo pa Ramsar Area Klein Curaçao (Minister di Salubridat, Medio Ambiente i Naturalesa)
Konseho di Minister a tuma nota di e produktonan final di e “Development Plan for Ramsar Wetland of International Importance #2355: Klein Curaçao, RES-48/CUR”. E dokumentonan akí a wòrdu presentá dia 12 di mei 2025 dor di Minister di Salubridat, Medio Ambiente i Naturalesa, responsabel pa e Sektor di Agrikultura, Medio Ambiente i Naturalesa.
E dokumentonan ta wòrdu enkaminá pa Sekretario-General di Ministerio di GMN, ku e petishon pa presentá esakinan na e Grupo di Trabou Interministerial Klein Curaçao, ku a keda instituí pa medio di dekreto nashonal di 10 di yanüari 2019.
3. Dia liber pa empleadonan di gobièrnu riba djabièrnè 30 di mei 2025, despues di Dia di Asenshon (Minister di Maneho di Gobernashon, Planifikashon i Servisio Públiko)
Konseho di Minister a disidí di bai di akuerdo ku dokumentashon di e desishon ku a tuma anteriormente riba 22 di mei 2025. Ku e desishon akí a aprobá ku empleadonan di gobièrnu lo tin e dia liber riba djabièrnè 30 di mei 2025, kual ta e dia despues di Dia di Asenshon, te na e grado ku nan trabou ta pèrmití esaki. Esaki ta registrá den e sirkular di Minister di Maneho di Gobernashon, Planifikashon i Servisio Públiko ku mésun fecha.
