Publiká riba 01 Sèptèmber 2022
Desishonnan relashoná spesífikamente ku asuntunan di pais riba nivel nashonal di djárason, 31 di ougùstùs 2022:
1. Konseho di Minister a bai di akuerdo pa lanta un grupo di direkshon i di trabou “UBO-register” (Ultimate Beneficial Owner) ku mester duna konseho na Minister di Finansa i Minister di Hustisia tokante e entidat ku ta bai ta enkargá ku registrashon sentral privá di personanan ku ta doño prinsipal di sea un negoshi, fundashon òf asosiashon. E komishon mester bini ku proposishonnan tokante struktura i kontenido di e registro i e forma di raportá.
Pa mas informashon tuma kontakto ku ministerio di Finansa i/òf ministerio di Hustisia.
2. A bai di akuerdo ku proposishon di Minister di Finansa pa entregá un di dos petishon na Sekretario di Estado enkargá ku Asuntunan Interior i Relashonnan den Reino i Digitalisashon pa refinansiá e debe na Hulanda (karta den konsepto fechá 29 di ougùstùs 2022).
Pa mas informashon tuma kontakto ku ministerio di Finansa.
3. Konseho di Minister a tuma nota di e di sinku raportahe “Stuurgroep Hervormingen in de zorgsector” presentá pa Minister di Salubridat Públiko, Medio Ambiente i Naturalesa riba 19 di ougùstùs 2022.
Pa mas informashon tuma kontakto ku ministerio di Salubridat Públiko, Medio Ambiente i Naturalesa.
4. Konseho di Minister a bai di akuerdo ku kontenido i direkshon di e dekreto nashonal den konsepto presentá pa Minister di Asuntunan General relashoná ku apertura di e Aña Parlamentario riba djamars, 13 di sèptèmber 2022. Tambe a bai di akuerdo pa presentá e dekreto nashonal den konsepto na Gobernador pa keda firmá.
Pa mas informashon tuma kontakto ku ministerio di Asuntunan General.
5. A bai di akuerdo ku petishon di Minister di Desaroyo Ekonómiko pa duna e outorisashon nesesario ku ta hasi posibel pa Ministerio di Desaroyo Ekonómiko krea un “domeinnaam” nobo den kuadro di lansamentu di e aplikashon “Prijspublicatie”.
Pa mas informashon tuma kontakto ku ministerio di Desaroyo Ekonómiko.
