Publiká riba 08 Ougùstùs 2025
Desishonnan relashoná spesífikamente ku asuntunan di pais riba nivel nashonal di djárason, 6 di ougùstùs 2025:
1. RAC ta kordiná Strategia Nashonal di AI (Ministerio di Enseñansa, Siensia, Kultura i Deporte)
Konseho di Minister a bai di akuerdo pa asigná Regulatory Authority of Curaçao (RAC) komo kordinadó di e Strategie Nashonal pa Inteligensia Artifisial (AI). E desishon akí ta basá riba e petishon di 22 di yüli 2025, i konseho di RAC.
2. Plan di akshon pa rekuperá di pasado di sklabitut presentá na BZK (Ministerio di Enseñansa, Siensia, Kultura i Deporte)
Konseho di Minister a aprobá e “Plan di akshon pa rekuperá di pasado di sklabitut di Kòrsou,” un kolaborashon interministerial den kuadro di hustisia, rekonosementu, i progreso. E plan lo wòrdu presentá na Direktor General di Relashonnan den Reino di Ministerio di Asuntunan Interior i Relashonnan den Reino.
3. Akuerdo di maneho nobo ku Fundashon Kas Popular (Ministerio di Tráfiko, Transporte i Planifikashon Urbano)
Konseho di Minister a aprobá e konsepto di akuerdo di maneho entre Pais Kòrsou i Fundashon Kas Popular (FKP) tokante bibienda públiko i otro bibienda, bálido di 16 di mei te ku 31 di desèmber 2025. Minister di Tráfiko, Transporte i Planifikashon Urbano ta outorisá pa firma e akuerdo akí.
4. Desishonnan riba e registro di Bandera di Kòrsou (Ministerio di Desaroyo Ekonómiko)
Konseho di Minister a yega na palabrashonnan pa loke ta trata e registro di barku internashonal di Kòrsou. Preparashonnan ta andando pa deskontinuá dunamentu di sertifikado nobo di registrashon (zeebrieven). Tambe tin negosiashonnan andando pa prevení ku ta sera e registro i pa sigurá finansiamentu di un plan di mehorashon.
5. Aseptashon di e rapòrt riba impakto di kambio di klima (Ministerio di Tráfiko, Transporte i Planifikashon Urbano)
Konseho di Minister a tuma nota di e promé rapòrt tokante e impakto di kambio di klima riba Kòrsou, prepará pa Servisio Meteorológiko. Minister di Tráfiko, Transporte i Planifikashon Urbano lo kordiná e trayekto ku ta sigui.
6. Rapòrt di ILO 2025 aprobá (Ministerio di Desaroyo Sosial, Labor i Bienestar)
Konseho di Minister a aprobá e rapòrt di ILO 2025 pa Kòrsou. Despues di firma di Promé Minister, e rapòrt lo keda entregá serka e Organisashon Internashonal di Labor (ILO).
