Publiká riba 09 Mei 2025
Desishonnan relashoná spesífikamente ku asuntunan di pais riba nivel nashonal di djárason, 7 di mei 2025:
1. Promé rapòrt di sektor kolektivo Kòrsou 2023 a ser presentá (Minister di maneho di Gobernashon, Planifikashon i Servisio Públiko)
Konseho di Minister a tuma nota di e karta di Direktor di Ofisina Sentral di Estadístika (CBS) fechá 14 di aprel 2025, ku e tema ‘Promé rapòrt di sektor kolektivo Kòrsou 2023’. E karta akí a ser presentá riba 30 di aprel 2025 dor di e Minister di Maneho di Gobernashon, Planifikashon i Servisio Públiko.
2. Konseho riba prioridatnan i enkargo pa investigashon di preis i tarifanan di kosto den e sektor di kuido VVT (Minister di Salubridat, Medio Ambiente i Naturalesa)
Konseho di Minister ta aprobá kontenido di e dokumento preliminar di Kondishonnan di Referensia (Terms of Reference) pa investigashon di preis di kosto, efisiensia i tarifanan den e sektor di Enfermeria, Kuido i Kuido na Kas (VVT) na Kòrsou. E investigashon aki lo keda realisá pa e órgano den fase di formashon, Regulatory Authority Curaçao. E desishon akí a tuma lugá basá riba proposishon di Minister di Salubridat, Medio Ambiente i Naturalesa di 30 di aprel 2025 i e konseho di Direktor di Regulatory Authority of Curaçao (RAC) di 10 di aprel 2025.
