Publiká riba 01 Mei 2024
Willemstad – Djasabra 4 di mei, durante un seremonia sòlèm na monumento di guera “Monument der Gevallenen” na Waaigat, ta konmemorá esnan ku a pèrdè nan bida den Segundo Guera Mundial. Alabes riba e fecha aki ta duna rèspèt na, i rekordá tur militar i sivil ku durante temporada di guera, mishonnan di pas di organisashonnan internashonal òf na man di teroristanan, a bin pèrdè nan bida. E seremonia na Monumento di Guera na Waaigat ta kuminsá 9:00’or di mainta. E di dos parti, na Santana Militar na Roodeweg, ta kuminsá 10:30’or di mainta. Tur hende ku ta interesá por akudí.
E akto pa konmemorá e víktimanan di guera ta unu di sumo importansia, pa motibu ku den lus di sustu i tristesa kousá pa Segundo Guera Mundial komunidat internashonal a disidí ku ningun hende, hamas, mester falta ‘E Derecho di tin Derecho’. Pa duna forma moral i forsa legal na esaki, a buta balor humano den palabra i ankra esaki den e derechonan fundamental di hende.
Gobièrnu di Kòrsou, Marina Real, Polis, VKC, Milisia di Kòrsou, Scouting Antiano, Brigada di Seguridat, SMEC, KPC, komunidat Hudiu, veteranonan i famianan di esnan ku a pèrdè nan bida durante Segundo Guera Mundial kada aña ta bini huntu pa konmemorá e echo aki.
