Notisia

Agente Nashonal di Erasmus+ Enseñansa i Entrenamentu ta na Kòrsou pa duna info.

Willemstad- Despues di enkuentro entre e Ministerio di Enseñansa, Siensia i Kultura/OCW di Hulanda i representante di Ministerio di Enseñansa, Siensia, Kultura i Deporte di Kòrsou/ESKD, e Agente Nashonal di Erasmus+ Enseñansa i Entrenamentu (Nationaal Agentschap Erasmus+ Onderwijs & Training) ta na instanshanan na Bonaire, Aruba i Kòrsou di 18 pa 22 novèmber 2019 pa duna tur interesado den tur e sektornan di enseñansa informashon tokante di e posibilidatnan di e “Programa di Subsidio Erasmus+ pa e islanan menshoná.

Skolnan riba e islanan por entregá petishon di supsidio na Erasmus+, tantu pa e asina yamá Mobiliteit (KA1) komo pa e partnership Stratégiko (KA2). Ta bai pa proyektonan ku ta keda hasí den estrecho koperashon ku otro paisnan Europeo. E programa su intenshon no ta interkambio entre e islanan menshoná i Hulanda, pero otro paisnan. Ora ta papia di enseñansa, tantu enseñansa di fundeshi, enseñansa sekundario, enseñansa di fishi i enseñansa avansá por entrega proyekto pa finansiamentu.

Pa mas informashon por tuma kontakto ku Direktor di Sektor di Enseñansa i Siensia sr. Wladimir Kleinmoedig, na Ministerio di ESKD na e number nobo di telefòn pa e sektor di Enseñansa i Siensia na Bonbini Business Center: 43 43 702.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte