EU-Desk Curaçao i CITI ta organisá otro seshon eksitoso di ‘Introduction to Grant Seeking Fundamentals’
Willemstad-Djaweps 7 di Mart último, un total di shete (7) partisipante a risibí nan sertifikado pa a kompletá e training ‘Introduction to Grant seeking Fundamentals’ ku éksito, for di man di Minister di Desaroyo Ekonomiko, sr. Ruisandro Cijntje. Durante kuater seshon e partisipantenan a enfoká riba maneranan ku nan por krea un strategia pa apliká pa fondonan disponibel pa nan proyektonan. Partisipantenan a haña informashon kon pa identifiká i investigá posibilidatnan di fondo i finansiamentu, análisis di nan nesesidatnan i planeamentu di nan proyekto i mas ku klaro introdukshon na skirbimentu di un petishon pa fondo.
E training ‘Introduction to Grant seeking Fundamentals’ ta keda organisá pa EU-Desk Curaçao ku ta un departamento bou di Ministerio di Desaroyo Ekonómiko (MEO) den kolaborashon ku Curaçao Institute for Technology and Innovation (CITI). Meta di e training akí ta, pa yuda organisashonnan lokal orientá mihó riba posibilidatnan ku tin pa haña fondo, sea esaki ta den forma di supsidio, donashon òf otro formanan di fondo eksistente. Durante e training e partisipantenan ta siña entre otro kon pa pone nan plan riba papel di forma konkreto, kon pa usa e plan akí pa por apliká pa e diferente fondonan disponibel i kon pa tuma akshonnan konkreto pa por realisá nan metanan. Na final di e training, kada partisipante tin un plan riba papel i un direkshon kon pa sigui tuma akshon pa kuminsá realisá e metanan di su organisashon. Dependiendo di e organisashon i kon leu desaroyá su plannan ta na inisio di e training, algun partisipante ta sali ku plannan kla pa ehekushon i otronan ta sali ku hèrmèntnan pa profundisá i desaroyá un poko mas.
Esaki ya ta di dos bia ku e EU-Desk Curaçao i CITI ta organisá e
training ‘Introduction to Grant Seeking Fundamentals’ ku éksito. EU-Desk Curaçao i CITI ta organisá e tipo di seshonnan akí, mirando ku tin hopi fondo, prinsipalmente di Union Oropeo, ku nos pueblo tin derecho riba dje. Tin naturalmente e fondonan di desaroyo di Union Oropeo ku ta bai via Gobièrnu, pero aparte di esakinan tin miónes di otro tipo di fondo ku organisashonnan na Kòrsou por apliká dirèkt serka Union Oropeo. EU-Desk Curaçao a tuma nota ku, apesar ku tin hopi posibilidat di fondo disponibel, nos organisashonnan lokal no ta hasi uso di nan efektivamente prinsipalmente pa falta di e konosementu kon pa apliká. E training ‘Introduction to Grant Seeking Fundamentals’ ta yuda eliminá e barera akí i ta alsa e kantidat i kalidat di aplikashonnan pa fondo for di organisashon i empresanan lokal.
Ta e intenshon ku durante e aña akí, EU-Desk Curaçao huntu ku CITI lo sigui ofresé e training ‘Introduction to Grant Seeking Fundamentals’ di moda ku mas organisahon i empresanan lokal por haña e oportunidat pa partisipá. Di e forma aki, ta yuda brinda kapasitashon kada bes na mas persona pa yega na fondonan tantu for di Union Oropeo komo otro fondonan disponibel.
Riba e foto(nan) por mira momentu ku Minister Cijntje ta entregá e sertifikadonan na e partisipantenan. Esaki a tuma lugá na ofisina di CITI den Riffort Village – Otrobanda.
