Notisia

Hulanda, Kòrsou, i Sint Maarten a disidí pa revoká e “Voogdijregeling”, ku ta na vigor for di 10 di òktober 2010, entrante promé di novèmber 2025. E desishon a wòrdu tumá den konsulta ku “Voogdijraden” di e tres paisnan i “Raad van Kinderbescherming” na Hulanda, despues di deliberashon ekstenso durante Justitieel Vierlanden Overleg.

E “Voogdijregeling” ku originalmente tabata destiná pa protehá menor di edat den eks Antia Hulandes ku tabata establesé na Hulanda, a resultá di no ta nesesario mas. Danki na avansenan teknológiko, awor ta posibel pa ehersé e outoridat di mayor for di distansia sin presensia físiko di un tutor. Ademas, E areglo no ta kumpli mas ku normanan vigente pa trato igual entre e paisnan di Reino.

E eliminashon di e “Voogdijregeling” ta duna mayornan den e parti Karibense di Reino e responsabilidat kompletu pa e kuido i guia di nan yunan. Ademas, menornan di edat den region for di awor i den futuro lo wòrdu tratá di e mesun manera ku menornan di otro pais.

Ku eliminashon di e “Voogdijregeling”, e dekreto ku ta kontene instrukshon di promé di februari 2006, i e “Werkwijze Voogdijrgeling Minderjaringen uit het Caribisch Deel van het Konkrijk” lo no ta aplikabel mas. Ministerio di Hustisia Kòrsou ta duna informashon pa mayornan sa kiko pa hasi si nan yu menor di edat bai Hulanda òf un otro pais den Reino pa motibonan di estudio òf mediko.

E kambio importante aki ta enfatisá e kompromiso di Minister di Hustisia pa implementa un maneho di protekshon pa hubentut ku ta moderno i hustu, hasiendo uso di teknologia pa sostené i fortalesé lasonan familiar.