Publiká riba 17 Ougùstùs 2021
WILLEMSTAD – Gobièrnu di Kòrsou, den presensia di Promé Minister Gilmar Pisas (ademas Minister di Hustisia), Minister Ruthmilda Larmonie-Cecilia di Desaroyo Sosial, Labor i Bienestar, Minister Sithree van Heydoorn di Edukashon, Siensia, Kultura i Deporte i Komandante di Forsa Naval di region di Karibe, Brigada General di Marina Frank Boots, a firma e akuerdo pa profeshonalisá “Sociaal Vormings Traject” Kòrsou (SVT). E akuerdo ta resultado di palabrashonnan anteriormente hasí a traves di e Pakete Pais (Landspakket). Defensa lo paga un parti grandi di e kurso. E enkargo final di e SVT ta sinta serka Gobièrnu di Kòrsou.
E ‘Sociaal Vormings Traject’ (SVT) na Kòrsou ta drenta un fase nobo. A firma e akuerdo ku ta hasi posibel pa sigui profeshonalisá SVT. Ku e akuerdo nobo e ministerionan konserní na Kòrsou i Defensa a yega na un palabrashon mutuo pa pone mas rekurso humano i finansiero na disposishon di e SVT. Ademas, ku e akuerdo nobo e porta a habri pa tambe ofresé edukashon na solamente hende muhé. E akuerdo a keda firmá na Marinebasis Parera.
E kurso ‘Sociaal Vormings Traject’ ta konsistí di un parti di formashon militar i un parti di stazje. E kurso ta pa hóbennan ku un défisit sosial, ku hopi bia tin di haber ku problemanan sosial. Den e kurso e hóbennan ta siña normanan manera traha huntu, rèspèt, regularidat, responsabilidat i disiplina. Nan ta haña edukashon militar básiko i nan ta risibí un barèt i sertifikado na final di e parti di formashon. Despues e hóbennan mester kore stazje seis luna pa un aña largu pa por kompletá e kurso. Di e forma akí nan lo ta prepará pa e próksimo paso den komunidat sivil.
E parti di formashon militar di e SVT ta dura sinku luna i ta tuma lugá na Marinekazerne Suffisant. E instruktornan ta militarnan di e forsa militar na Kòrsou. Gobièrno di Kòrsou tambe ta pone personal na disposishon di e kurso. Durante di e fase militar ta entre otro drel e hóbennan, nan ta hasi hopi deporte, nan ta siña kon pa defendé nan mes i nan ta bivaker. Nan ta kompletá e fase militar ku een tèst final ku ta dura un siman.
Hende Muhé
Un desaroyo nobo den e SVT ta ku den e akuerdo nobo hende muhé tambe por sigui e kurso. Kuminsando for di 2022, strukturalmente lo bai duna pa aña dos kurso pa hende hòmber i hende muhé, ku un máksimo di 35 persona pa kada kurso. E aña akí Defensa tambe a firma un akuerdo nobo ku Gobièrnu di Aruba.
