Publiká riba 11 Febrüari 2024
WILLEMSTAD – E edifisio ku ta situá na e adrès Breedestraat 190 (Otrobanda) ta den un estado di atenshon ku ya den pasado a tuma sierto medida pa kuné.
E situashon di e edifisio a sigui deteriorá debí na entre otro áwaseru di último dianan i konsiderando e peliger ku e edifisio aki ta forma, instansianan gubernamental no ta tuma rísiko pa tene e espasio liber durante e Gran Marcha di Karnaval di awe, djadumingu, 11 di febrüari 2024.
Den konsulta ku outoridat a opta pa sera e parti dilanti di e edifisio pa evitá ku públiko lo para den su serkania. Ta sera e área for di e entrada di hospital bieu te na subida di Frederikstraat.
E petishon ta bai na públiko pa evitá e área ei. Ta prohibí pa gruponan di karnaval toka musika den e área aki tambe. Lo bai tin vigilansia i alabes lo sigui monitor e situashon pa otro medidanan ku eventualmente lo mester tuma.
