Notisia

Kòrsou ta risibí mas di 6 mion dòler pa implementashon struktural di Agènda Akshon Pasado di Sklabitut (2025–2029)

WILLEMSTAD – Gobièrnu di Kòrsou a risibí formalmente e dekreto pa ehekutá e Agènda di Akshon Pasado di Sklabitut (2025–2029). E agènda nashonal akí a surgi for di e Plataforma Inter – ministerial pa Konmemorashon, Rekonosimentu i Rekuperashon, ku a keda instituí formalmente na aña 2024 mediante dekreto nashonal (nr. 24/757). For di e momento ei, e plataforma ta forma e kuadro di maneho struktural den kua Kòrsou ta traha riba rekuperashon, rekonosimentu i e impakto sosial di e pasado di sklabitut.

Konforme artíkulo 36 di Statüt di Reino Hulandes, Direktorado-General pa Relashonnan den Reino a aloká un kontribushon máksimo di USD 6.047.130 pa ehekushon di e agènda di akshon aki entre 1 di òktober 2025 i 30 di sèptèmber 2029.

Kolaborashon inter – ministerial komo base: Diferente ministerio a traha huntu riba e desaroyo di e agènda di akshon, pa asina sigurá ku e maneho i ehekushon ta kana huntu.:
• Ministerio di Enseñansa, Siensia, Kultura i Deporte (OWCS)
• Ministerio di Salú, Medio Ambiente i Naturalesa (GMN)
• Ministerio di Desaroyo Sosial, Labor i Bienestar (SOAW)
• Ministerio di Gobernashon, Planifikashon i Servisio (BPD)

E agènda a ser desaroyá mediante un proseso amplio di partisipashon. A organisá dies seshon di diálogo ku organisashonnan sosial i seis seshon di trabou interno den e ministerionan envolví. Na total, mas o ménos shen representante di kuido di salú, enseñansa, kultura, bienestar i trabou a -tuma parti aktivo den e trayekto akí.

E manera di traha akí ta suprayá klaramente ku e pasado di sklabitut no ta un kapítulo sera. E konsekuensianan di dje ta sigui influensia te awe den institushonnan moderno, maneho, kuido di salú i den e relashonnan sosial kontemporáneo den nos komunidat.

Kuater Pilar Stratégiko a ser definí: E rekursonan disponibel ta ser repartí igual bou di e kuater pilar stratégiko:

• Digitalisashon di e Archivonan Kolonial (BPD)

Mas ku 4.000 kaha di archivo ku ta kontené mas o ménos 2.6 mion dokumento lo wòrdu digitalisá. Esaki lo hasi material históriko esensial aksesibel mundialmente pa investigadónan, institutonan edukativo i desendientenan di hendenan sklabisá. E proyekto tambe ta kontribuí na konservashon di herensia, desaroyo di konosementu i empleo lokal.

• Edukashon, Idioma i Herensia (OWCS)
E pila aki ta enserá tres trayekto prinsipal:
• Kreashon di un maneho nashonal pa museo.
• Desaroyo di un lista di idioma di skol i hargon tékniko na Papiamentu.
• Eksplorashon di maneho pa un modelo di idioma di enseñansa pa Hulandes funshonal den e konteksto karibense multi-lingwal.

E meta ta un práktika di enseñansa ku ta konektá mihó ku e mundu di bida i idioma di e yu di tera, pa asina e studiantenan haña mas chèns pa logra nan éksito. Na mes momento, ta traha riba deskolonisashon di e kuríkulo i fortalesa duradero di e tereno kultural, pa sostené igualdat di oportunidat i inklusividat. E pilá akí tin tres proyekto kardinal ta trata di un maneho nashonal pa museo, desaroyá di un lista di idioma di skol i terminologia den materia na papiamentu, i eksplorashon di maneho pa un modelo di idioma di enseñansa pa Hulandes funshonal den e konteksto multilingual karibense.

E propósito ta pa laga e enseñansa konektá mihó ku e realidat i e idioma di e mucha na Kòrsou. Asina, alumnonan tin mas oportunidat pa desaroyá i progresá na skol. Na mes momentu, ta traha riba renovashon i de-kolonisashon di e kuríkulo di enseñansa i riba fortifikashon duradero di e sektor kultural. Tur esaki ta kontribuí pa mas igualdat, oportunidat i inklushon den nos komunidat.

Kuido di Salú i Komunidat (GMN)

• E pila aki, bou di e título Rekuperashon, Rekonosementu, Rekonosementu, i Sosten, e enfoke ta riba fortifikashon di organisashonnan di kuido sosial i rekonosementu di polítika di medisina tradishonal Kòrsou. Esaki lo yuda redusí desigualdatnan di salú i restorá konfiansa den loke a ser desaroyá histórikamente.

• Rekuperashon i sosten sosio-ekonómiko (SOAW)

E pilá akí tin komo meta pa sostené famianan vulnerabel, luchá kontra pobresa, yuda hende haña mihó akseso na trabou i promové rekuperashon sosial entre generashonnan.

Rekuperashon struktural komo un trayektoria nashonal

Ku e agenda di akshon akí, Kòrsou ta mustra ku e ta tuma na serio e promesa di rekonosé e pasado di sklabitut, manera a wòrdu ekspresá riba 19 di desèmber 2022. Esaki ta un paso pa dilanti ku nos tur ta hasi huntu, ku akshonnan konkreto i koherente. Gobièrnu ta enfatisá ku rekuperashon no ta un medida di un solo biaha, sino un proseso struktural ku ta toka nos komunidat den su totalidat. Un proseso ku ta enfoká riba un mihó enseñansa, bon kuido di salú, konsientisashon kultural i hustisia sosial pa awor i pa generashonnan di futuro.

E Agènda di Akshon di Pasado di Sklabitut 2025–2029 ta marka asina un paso importante den e proseso pa ankra di forma institushonal rekuperashon, rekonosementu i fortifikashon sosial duradero.

—

Komunikashon

MAS NOTISIA

Ministerio konserní: Enseñansa, Siensia, Kultura & Deporte