Publiká riba 25 Òktober 2024
WILLEMSTAD – Kòrsou i Repúblika di Sürnam a tuma un paso importante pa fortifiká relashon komersial i kultural entre e dos paisnan. Esaki a tuma lugá dia 22 di òktober ultimo na momentu ku Minister di Desaroyo Ekonómiko di Kòrsou i Minister di Relashonnan Internashonal di Sürnam a firma un akuerdo durante un seremonia ku a tuma lugá na Ministerio di Desaroyo Ekonómiko di Kòrsou.
Na e okashon aki Minister di Desaroyo Ekonómiko Su Ekselensia Charles Cooper i Minister di Relashonnan Internashonal di Sürnam Su Ekselensia Albert Ramdin a firma un akuerdo pa start negosiashon di un ‘Partial Scope Trade Agreement’. E seremonia a forma parti di e bishita ofishal di Su Ekselensia Presidente Chandrikapersad Santokhi di Repúblika di Sürnam na Kòrsou i a tuma lugá den presensia di Presidente Santokhi huntu ku Su Ekselensia Promé Minister Gilmar Pisas di Kòrsou.
E akuerdo ta un paso grandi pa intensifiká komèrsio i invershon entre e dos paisnan. E ta forma un base sólido pa redusí bareranan komersial, stimulá komèrsio bilateral i fasilitá invershon den diferente sektor. Aki por pensa riba e siguiente sektornan:
Segun Minister Cooper, e akuerdo ta reflehá e historia largu di kolaborashon fruktífero entre e dos paisnan. El a referí tambe na akshonnan previo manera e akuerdo fiskal firmá na aprel 2024 pa prevení dòbel impuesto i stimulá invershon.
Minister Cooper a añadí ku den futuro Kòrsou lo sigui kompañá Sürnam den su desaroyonan potensial den sektornan vital manera energia. “Sürnam ta pará na komienso di un desaroyo ekonómiko signifikante, i nos ta wak esaki komo un oportunidat pa fortifiká nos relashon i sigurá un futuro di prosperidat kompartí,” Minister Cooper a resumí.
Minister Ramdin a splika ku e akuerdo ta resultado di un trayekto largu pa kua e dos paisnan a traha intensivo i hiba hopi kombersashon. E ta simbolisá un kapitulo nobo den e relashon históriko i fraternal entre e paisnan, pero prinsipalmente den koperashon komersial. E minister a enfatisá e importansia di koperashon riba tur nivel. “Ora implementá e akuerdo aki, ta esensial ku nos paisnan tin un kolaborashon práktiko riba nivel ministerial i tekniko. Eksito di e akuerdo aki ta depende di esfuerso mutuo di tur dos Partido”, Minister Ramdin a bisa. Presidente Santokhi a enfatisá e posibilidatnan di koperashon riba tereno di desaroyo industrial i ta apoyá kolaborashon ku sektor industrial di Kòrsou. “Nos mester di Kòrsou su konosementu riba tereno finansiero, fiskal i hurídiko pa apoyá nos desaroyo”, presidente Santokhi a indiká.
