Notisia

Anunsio di organisashon di Karnaval 2026–2027

Ministerio di Enseñansa, Siensia, Kultura i Deporte (ESKD) na nòmber di Gobièrnu ta anunsiá ku e proseso di destaho públiko pa un organisadó pa nos Fiesta di Karnaval 2026–2027 a terminá. E destaho a tuma lugá dia 18 di yüli 2025, ku presensia di un supervisor na nòmber di Ministerio di ESKD i testigunan independiente, pa garantisá un proseso transparente.

Gobièrnu a risibí tres inskripshon. Despues di un evaluashon kuidadoso di e ofertanan entregá, basá riba kriterio i kondishon fihá, e kontrato pa organisashon di Fiesta di Karnaval 2026–2027 a ser otorgá na: Beehives B.V.

E evaluashon a mustra ku e organisashon ariba menshoná a kumpli mihó ku e eksigensianan riba tereno di konfiabilidat, dokumentashon i kapasidat di ehekushon. Ku e otorgamentu akí, gobièrnu ta ekspresá su konfiansa ku Beehives B.V. lo organisá Karnaval di Kòrsou 2026 i 2027 den un manera profeshonal, sigur i di un kalidat haltu, den kolaborashon ku gobièrnu en espesial ministerio di ESKD, gruponan di interes i komunidat.

Sektor di Kultura i Deporte di e Ministerio di ESKD, ta keda enkargá ku otorgamentu di supsidio, guia i supervishon riba e organisashon di aktividatnan pa nos di Fiesta di Karnaval na Kòrsou.

—

Sr. Sithree Van Heydoorn

Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte