Notisia

WILLEMSTAD – Resientemente minister di Hustisia sr. Shalton Hato i ministerio di Enseñansa, Siensia, Kultura i Deporte (ESKD) sr. Sithree van Heydoorn a firma un protokòl pa traha huntu den kuadro di resosialisashon di klientenan di Sentro di Detenshon i Korekshon Kòrsou (SDKK). E protokòl ak ta e base kaminda SDKK i Openbaar Secundair Beroepsonderwijs Deeltijdsopleidingen (OSBOD) ta bai traha huntu ofresé enseñansa i formashon na klientenan den SDKK.  

E trayekto akí ta unu kaminda ta duna un total di 36 kliente formashon den estudio di kosementu, fèrfmentu i autotechniek. Un tim di kolaboradó di SDKK i OSBOD a traha huntu pa 16 luna largu pa asina kuminsá ku e trayekto di enseñansa den prizòn. E apertura a kuminsá ku maestro di seremonia sr. J. Pinedo, siguí pa kolaboradó di SDKK, sr. M. Jamanika, kende a habri e mainta ku un bunita orashon. Seguidamente direktor suplente di SDKK, sr. A. Hasselmeyer, a hiba palabra i duna un rekuento di e trayekto. Sr. Hasselmeyer a yama e eksdirektornan di SDKK, sr. Floran i sr. Ricardo, danki pa nan esfuerso na momento ku kada unu a traha na e trayekto. Tambe a gradisí i yama danki na sr. Maria, sr. Benito, sr. Carlo, sr. Römer, sra. Llewellyn, sra. Rojer, sra. Jessurun, sr. Overman, sra. Zwerwer i sra. Elizabeth pa nan aporte ku ta di gran balor pa kristalisashon di e trayekto di enseñansa den SDKK. Despues direktor di OSBOD, sra. Zwerver, tambe a hiba palabra i mustra e klientenan ku awor nan ta studiante i a enkurashá kada un di nan pa sigui traha duru na nan desaroyo.  

Minister di ESDK sr. Sithree van Heydoorn a konsehá tur e 36 studiantenan pa hasi un eskoho den bida pa krea oportunidat pa kambio. Minister a pidi kada un di e partisipantenan pa skohe awe pa kambio i biba e kambio akí. Minister di Hustisia sr. Shalton Hato a mustra riba e echo ku e tei pa kumpli ku loke el a bisa aña pasá. For di momento ku el a sinta komo minister, a bis’é ku prizòn no tin nada pa ofresé e klientenan. P’esei e ta kumpli ku su palabra i pone formashon i enseñansa pa klientenan di SDKK. 

A hasi apertura di e promé lokalidat kaminda ta bai duna e lèsnan, i e ministernan, huntu ku nan kolaboradónan, a haña un rekorido i splikashon serka e personanan ku ta bai duna lès i práktika na e klientenan kende a bira studiante di e promé aña eskolar di SDKK/OSBOD.  

— 

KOMUNIKASHON 

*Riba e potrètnan por tuma nota di e momento ku a hasi apertura di aña eskolar 2024 di SDKK/OSBOD. Pa mas potrèt por bishitá: Apertura Aña Eskolar 2024 SDKK/OSBOD.

MAS NOTISIA

Gobièrnu di Kòrsou