Notisia

Inspekshon ta fortalesé supervishon independiente i ta habri porta pa komunidat durante dianan habrí

Willemstad – Inspekshon di Enseñansa Kòrsou ofisialmente a habri su ofisina nobo na Oranjestraat 7, e edifisio anterior di Oranje kleuterschool. Ku e lokalidat nobo akí, Inspekshon tin komo meta pa sigui fortalesé su ròl komo supervisor independiente di kalidat di enseñansa.

Durante un seremonia ofisial, minister di Enseñansa, Siensia, Kultura i Deporte, señor Sithree van Heydoorn a habri e edifisio. Despues di esaki, a duna e invitadonan un rekorido den e ofisina nobo i nan a kombersá ku inspektornan tokante e trabou di e Inspekshon.

Segun inspektor-general señor Raily Goedgedrag, e apertura aki ta marka un paso importante den e desaroyo di supervishon di enseñansa na Kòrsou. “Enseñansa di kalidat ta rekerí konfiansa, transparensia, i sentido di responsabilidat. Inspekshon di Enseñansa ta kontrolá si institutonan di enseñansa ta kumpli ku lei i maneho, ta informá riba kalidat di enseñansa, i ta konsehá Minister tokante mehorashon.”

Inspekshon ta traha ku un forma moderno di supervishon den kua transparensia, diálogo i profeshonalismo ta sentral. E meta ta pa kontribuí na mihó enseñansa i oportunidat igual pa tur alumno na Kòrsou. E ofisina nobo ta ofresé un ambiente profeshonal i habrí pa diálogo i kolaborashon.

Dianan habrí
E apertura ta marka e inisio di dianan habrí na Inspekshon di Enseñansa dia 20 i 21 di mart 2026. Durante e dianan aki, vários grupo di enfoke lo tin e oportunidat pa sera konosí ku e trabounan di e Inspekshon.
• Djabièrnè 20 di mart 2026: Direktiva di skol, direktor di skol i maestronan
• Djasabra 21 di mart 2026: Mayor, alumno, studiante i otro personanan interesá

Aksesibilidat
Inspekshon di Enseñansa ta na:
Oranjestraat 7, Willemstad
Telefòn: +5999 787 0028
E-mail: inspekshonensenansa@owcs.gov.cw òf inspectieonderwijs@owcs.gov.cw

—

Komunikashon

Ministerio di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte