Publiká riba 08 Òktober 2025
WILLEMSTAD – Despues di tres fin di siman eksitoso den region wèst, e kampaña “Di bo, Pa bo, Ku bo” ta kla pa bai region nort ku bakinan di shushi den bario. Kuminsando djasabra, 11 di òktober i djadumingu, 12 di òktober próksimo i pa tres fin di siman konsekutivo, habitantenan den e di dos zona (region nort) por deshasí di nan shushi – ku no ta bai den kliko – na un manera fásil. Zona nort ta konsistí di barionan Sta. Maria, Kanga/Dein, Buena Vista, Muizenberg/Suffisant i tambe Brievengat.
Apertura Zona 2: djasabra, 11 di òktober na SDK
Gobièrnu ta invitá tur habitante di region nort pa partisipá na e apertura ofisial di “Zona 2: Region Nort” riba djasabra 11 di òktober di 9’or te ku 12’or di mainta, na e plenchi di Stadion Ergilio Hato (SDK). Banda di por trese shushi pa tira den baki, lo tin un feria informativo ku aktividat pa mucha. Diferente kompania i organisashon ta forma parti di e feria informativo akí i lo duna informashon relatá na limpiesa i resiklahe.
Manera ya ta konosí, e kampaña pa limpiesa i konsientisashon sosial “Di bo, Pa bo, Ku bo” ta enfoká riba limpiesa di nos isla, komo paso importante pa promové salubridat públiko i krea un kultura di responsabilidat komun. Aña pasá a kolektá 24 mion kilo di shushi na total i e resultado a duna motibu pa ripití e kampaña den 2025. Aktualmente, e kampaña ta sigui su trayekto den su segundo zona di Kòrsou kaminda, durante 3 fin di siman, Ministerio di Salubridat Públiko, Medio Ambiente i Naturalesa (GMN) ta pone bakinan grandi pa fasilitá rekohida di shushi den bario mes, sin ku habitantenan tin ku kore bai te landfill.
E enfoke ta riba separashon di shushi i sostenibilidat pa asina komprondé ku shushi por tin balor si nos resiklá esaki. Tene Kòrsou limpi ta bira mas fásil ora komunidat ta komprondé ku shushi por tin balor. Mas i mas material ku normalmente nos ta tira afó, por biba un bida mas si nos resiklá òf bolbe usa esaki. Asina e montante di shushi ku nos ta tira afó ku por daña nos medio ambiente ku efektonan malu pa nos mes salú, por baha drástikamente.
Zona 2: Nort di Kòrsou
For di e wikènt di djasabra, 11 di òktober i djadumingu, 12 di òktober, lo tin baki di shushi entre 8’or di mainta pa 5’or di atardi na Rooseveltweg, riba skina di Cubaweg/Winston Churchillweg na Kanga/Dein, Santo Domingoweg na Buenavista, Kaya Muizenberg na Suffisant/Muizenberg i SDK na Brievengat. Sigui e skema den korant i kanalnan sosial di Gobièrnu di Kòrsou pa mas informashon. Lo tin kònteiner pa shushi resiklabel pa esnan ku ta bin ku nan shushi separá. Di e forma akí huntu nos ta traha pa un Kòrsou mas limpi, sostenibel i saludabel.
