Notisia

Willemstad –  Asuntunan Públiko esta Kranshi di e ministerio di Maneho di Gobernashon, Planifikashon i Servisio Públiko ta informá ku djamars 9, djárason 10 i djaweps 11 di dezèmber 2025, Kranshi ta habri 3 atardi èkstra. Esaki pa solamente pa personanan ku a risibí nan pèrmit di e proyekto “Tuma bo pèrmit“ bin inskribí nan mes.

“Tuma bo Pèrmit” ta e proyekto nobo di Toelatingsorganisatie Curaçao, esta Inmigrashon. Relashoná ku e proyekto aki Kranshi ta habri orario ékstra e djamars, djárason i djaweps benidero di 3:30 pa 6:00 di atardi pa asina e personanan aki por pasa i inskribí nan mes. No mester di sita durante e orario aki pa bin registrá.

Asuntunan Públiko ta habri e atardinan aki pa evitá ku tin un kantidat grandi di persona durante oranan normal di servisio na kranshi.

Personanan ku mester inskribí mester presentá ku:

• Pasport bálido
• Stèmpel di pèrmit di estadia den pasport (Organisashon di Atmishon Kòrsou)
• Desishon imprimí di permiso di estadia (Organisashon di Atmishon Kòrsou)
• Akta di nasementu original (apostilla/legalisashon), no mas ku 1 aña bieu
• Direkshon korekto na Kòrsou (nòmber di kaya i e number di residensia)
• Prueba di residensia (un di e siguientenan):
  • Kontrato di hür bálido i firmá
  • Outorisashon di residente prinsipal + kopia di su ID bálido
  • Akta di kompra
  • Pèrmit di konstrushon
• Formulario di ROP pa direkshon (si ta nesesario)
• Prueba di des-inskripshon (si e pais ku e ta saliendo ta den Reino Hulandes) no mas ku 1 aña bieu

Pa mas informashon por bishitá e website di gobièrnu di Kòrsou ku ta www.gobiernu.cw

MAS NOTISIA

Ministerio konserní: Maneho di Gobernashon, Planifikashon i Servisio Públiko