Publiká riba 08 Ougùstùs 2025
Willemstad – Den kuadro di publikashonnan resiente relashoná ku desaroyonan di e proyekto di rekonstrukshon di plasa, Ministerio di Desaroyo Ekonómiko (MEO) ta deseá pa trese klaridat i un aktualisashon.
E renobashon di plasa a sufri tardansa den su fase inisial pa motibu ku a deskubrí skeur den hopi di e kolòmnan di betòn. Relashoná ku esaki, un büró eksperto a konsehá pa basha tur 32 kolòm di nobo. E proseso aki a tuma tempu, ya ku e kontratista mester a bestèl materialnan for di afó i a traha konstrukshonnan di sosten i ‘bekisting’. Debí na e sirkunstansianan, a adaptá e planifikashon, i a fiha final di aprel 2026 komo e fecha di finalisashon di e proyekto. E kambionan den planifikashon a wòrdu komuniká na tur stakeholder konserní, di forma ku tur stakeholder ta na altura ki dia ta planiá pa terminá e trabounan.
Pa loke ta trata e kolaborashon ku Aqualectra i e kontratista, por bisa ku a tuma tur medida nesesario, i Aqualectra lo sigui duna konseho i sosten tékniko pa instalá i aktivá e sistema di awa i koriente. E proyekto ta inkluí remplaso di e sistema di awa, koriente i riolering kompletu. E fondonan pa tur esakinan tambe a keda presupuestá i reservá kaba.
E kambio den direktiva di Fundashon Marshe no tabatin ningun impakto riba e renobashon di Marshe, esaki teniendo kuenta ku ta MEO mes ta enkargá ku ehekushon i kordinashon di e trabounan i no Fundashon Marshe.
Pa konkluí, MEO ta enfatisá ku e fondonan pa tur e trabounan ta disponibel. E úniko gastu adishonal ta pa drecha e parti paden di algun unit ku a wòrdu hañá den mal estado. E fondonan pa e trabou aki tambe a keda reglá i e drechamentu di e unitnan lo kana paralelo ku e sobrá trabounan.
MEO ta suprayá su kompromiso pa finalisá e trabounan di rekonstrukshon i reinougurashon di marshe den e tempu stipulá i ta hasi un yamada na tur stakeholder konserní pa sigui traha huntu pa logra esaki.
