WILLEMSTAD – Awe 18 di òktober 2024 riba Dia Europeo kontra Trafikashon di hende, PATH (Prevenshon di Abusu i trafikashon di hende) ta ekspresá su kompromiso pa lucha kontra di e krímen aki i protekshon di víktimanan di trafikashon di hende. Aunke e dia aki ta un dia rekonosé pa Union Europeo, ta importante pa duna atenshon na e dia aki komo pais den Reino Ulandes.
PATH ta konsiente di e reto ku e temanan aki ta trese i e nesesidat pa pone urgensia na prevenshon, protekshon i tambe pa persiguí e delito aki. PATH ta trahando duru pa fortalesé su maneho i ta kolaborá ku partnernan lokal, regional i internashonal. Vários inisiativa nobo ta den desaroyo i pronto lo kuminsá implementá medidanan i protokòl nobo ku ta enfoká riba apoyo pa víktima di trafikashon, monitoring na frontera marítimo i aéreo.
Segun palabranan di Koordinadó Nashonal di PATH- “PATH ta enfoká riba prevenshon dor di konsientisashon i edukashon, i tambe riba sosten brindá na víktimanan. Ku PATH gobièrnu di Kòrsou ke re-enforsá e dedikashon pa eliminá trafikashon di hende for di nos baranka.”
Trafikashon di hende ta un violashon grave di derecho humano i no tin lugá den nos sosiedat. Ministerio di Hustisia ta trahando kontinuamente pa fortalesé nos inisiativanan atraves di PATH, esaki ku un enfoke speshal riba maneho, medida atministrativo (bestuurlijke aanpak), konsientisashon i tambe protekshon di víktimanan.
E Dia Europeo kontra Trafikashon di hende pa PATH ta un momentu pa reflekshoná riba e impakto di eksplotashon di hende i pa nos uni na e lucha kontra esaki. Huntu, ku nos partnernan lokal, regional i internashonal nos ta lucha pa un futuro sin trafikashon di hende.
– Un Esfuerso Kompartí pa Kòrsou komo pais den Reino Ulandes –
