Minister di ESKD sr. Sithree van Heydoorn a tene un diskurso kaminda e la enfoká riba e momentu ku sr. Modesto Margaretha a kibra e barera den Konseho Insular na 1958 dor di papia su idioma materno. Maske ku e gezaghebber di e tempu ei sr. Michael Gorsira a bisa pa stòp di papia papiamentu e la keda papia su idioma materno. Ku esaki Minister ta mustra ku komo siudadano nos mester sigui honra i papia nos lenga materno papiamentu den diferente aktividatnan mas i kibra tur barera ku ta stroba nos di alsa nos idioma papaiamentu. Presidente di Parlamento sra. Charetti America-Francica a elaborá riba e historia di nos idioma den Parlamento i tambe indiká ku awe tur parlamentario por tene nan disertashon na papiamentu den Parlamento di Kòrsou.
Minister di ESKD sr. Sithree van Heydoorn kompaña pa direktor di sektor di Kultura i Deporte sra. Lizette Sambo-Velder, Presidente di Parlamento sra. Charetti America-Francisca kompaña pa Grefir sr. Silvin Cijntje i famianan a pone un bunita krans na graf di sr. Modesto (Chano) Margaetha. Na mes momentu sektor di Kultura i Deporte a informá ku awe ta e inisio di un kantidat di aktividat na honor di nos lenga materno ku ta sigui durante di e periodo di 8 febrüari pa 21 febrüari 2025. Pero e aktividatnan aki, ku ta kulminá dia 21 febrüari 2025, ku ta dia Internashonal di Idioma Materno, ta keda publiká den un otro komunikado ku mas informashon.
Ministerio di ESKD por mira bèk riba un aktividat solèm kaminda a duna honor na Lenga Materno Papiamentu riba dia Nashonal di Lenga Materno Papiamentu i ta yama El Tributo/Morada Santa Bottelier danki pa nan aporte na e dia memorabel.
—
KOMUNIKASHON
*riba e potrètnan athunto por tuma nota di e konmemorashon kaminda Minister di ESKD, sr. Sithree van Heydoorn, Presidente di Parlamento sra. Charetti America-Francisca, i famia ta duna honor na sr. Modesto (Chano) Margaretha.
