Publiká riba 04 Sèptèmber 2017
For di dia 3 te ku dia 14 di yüli próksimo, Obra Públiko i e kontratista Kwekerij Exotische Tuinen, ta planta mata den besindario di e rotònde na Kaminda Andruw Jones, na altura di Stadion Ergilio Hato i Sentro Deportivo Kòrsou. Riba e rotònde mes ya kaba tin e struktura pa bandera, pues einan no por hasi plantashon.
E trabounan di planta mata ta tuma lugá, mas tantu posibel, entre 8’or di mainta i mitar di 12 i den e oranan di atardi entre mitar di 2 i 5’or di atardi. Asina ta evitá pa tráfiko pega durante di e oranan di mas drùk. E kontratista ta pone material di seguridat riba kaminda, pa e trahadónan por hasi nan trabou na un manera mas sigur. Esaki ta nifiká ku tráfiko mester tene kuenta ku e kaminda ta bira mas smal durante di e oranan di trabou.
Pa hendenan den bisindario di e rotònde por tin djis algun molèster na e momentunan ku e plantashon ta nèt dilanti di nan kas. E kontratista ta sòru pa e molèster ta keda na un mínimo i ku tur hende por drenta i sali nan tereno sin problema. Obra Públiko i Kwekerij Exotische Tuinen ta pidi komprenshon pa e trabounan.
