Publiká riba 15 Mei 2024
WILLEMSTAD – Dia 15 di mei 2024, señor Paul Hilbers, Direktor ehekutivo i representante di Reino Hulandes na Internationaal Monetair Fonds (IMF), a duna un presentashon na Konseho di Minister komo parti di su bishita di trabou di tres dia na Kòrsou (15 te ku 17 di mei).
IMF tin un ròl importante den e área di stabilidat finansiero-ekonómiko, kresementu i kombatimentu di pobresa pa Kòrsou dor di fortifiká bon maneho i kapasidat institushonal. Durante su presentashon, sr. Hilbers a splika tokante e ròl ku IMF por hunga den desaroyo sosial-ekonómiko i finansiero di Kòrsou.
E enkuentro akí a krea e oportunidat pa yega na interkambio di punto di bista i tambe konseho riba maneho, kual ta di gran importansia pa futuro desaroyo di Kòrsou.
Durante di su bishita, sr. Hilbers a ser akompañá pa sra. Carlijn Eijking ku ta konsehero pa Reino Hulandes.
