Publiká riba 09 Yanüari 2026
Willemtad – Riba djaweps, 8 di yanüari 2026, Promé Minister di Kòrsou, Sr. Gilmar Pisas, a risibí un delegashon di Konseho di Estado di Reino na Fort Amsterdam. Konseho di Estado (“Raad van State”) ta e órgano di konseho i korte atministrativo di mas haltu den Reino.
E delegashon tabata konsistí di señor Thom de Graaf (visepresidente di e Konseho di Estado), señor Paul Comenencia (miembro di e Konseho di Estado ku ta representá Kòrsou), Señora Rosa Uylenburg (presidente di Departamento di Korte Atministrativo), señor Han Polman (miembro di e Departamento di Konseho), Sra. Marja Horstman (Sekretaria di e Konseho di Estado) i señor Ron van der Veer (konsehero di e Konseho di Estado).
Durante e reunion, a trata e rapòrt emití pa e Konseho di Estado dia 16 di òktober 2024 den kuadro di e 70 aniversario di Statuut di Reino Hulandes. Den e rapòrt aki, e Konseho di Estado a formulá rekomendashonnan pa optimalisá e kooperashon entre e kuater paisnan den Reino. Dia 3 di sèptèmber 2025 Kòrsou a reakshoná riba e rekomendashonnan, loke a keda diskutí durante e reunion. Mas aleu a trata e prosedura formal ku e kuater paisnan di Reino lo sigui pa yega na un kontesta riba e rapòrt di Konseho di Estado. Tambe a trata e establesimentu di un areglo independiente pa resolvé disputanan den Reino i medidanan pa redusí e défisit demokrátiko den tomo di desishon den e órganonan di Reino.
E bishita di Konseho di Estado ta suprayá e importansia di konsulta strukturá riba futuro di Reino. Promé Minister Pisas a indiká ku Kòrsou ta keda dispuesto pa hunga un ròl aktivo i dirigí riba solushon al respekto. Den e kuadro aki, Konseho di Estado a indiká su disponibilidat pa sostené e deseo di Gobièrnu di Kòrsou pa organisá mas lat e aña aki e Konferensia di Reino, manera akordá entre e gobièrnunan na 2023. Durante e konferensia di Reino e kuater paisnan por deliberá riba solushonnan práktiko pa asuntunan ku ta afektá kooperashon den Reino. Segun Promé Minister Pisas, e reunion ku Konseho di Estado a brinda un oportunidat útil pa koordiná e siguiente pasonan pa establesé e prinsipionan pa futuro kooperashon den Reino. Kòrsou ta keda komprometé pa garantisá ku e proseso aki ta kontinuá na un manera transparente i ku rèspèt pa e outonomia di e paisnan karibense di Reino.
