WILLEMSTAD – Djamars 20 di ougùstùs 2024, Sentro di Detenshon i Korekshon Kòrsou a risibí bishita di un delegashon for di Hulanda i tambe di Kòrsou. E delegashon tabata konsistí di miembronan di Tweede Kamer di e Komishon di Hustisia i Seguridat, parlamentarionan di Kòrsou di e komishon di Hustisia i tambe Representante di Hulanda na Kòrsou sr. Edson Hato i su kolaboradornan.
E meta di e bishita akí tabata pa e bishitantenan sera konosí ku e struktura i retonan di SDKK pa medio di un presentashon i tambe haña un rekorido den e instituto.
Na e okashon akí a hiba palabra sr. Jabets Pinedo komo funshonario di Komunikashon, direktor suplente a.i. sr. Ludwin Maria, sra. Sharissa Llewellyn i tambe e diferente hefenan di departamento.
Durante e rekorido ku a tuma lugá na blòknan 6, 3, 2, FOBA, 8a i Vocational Building (OVT) e bishitantenan tabatin oportunidat pa por a interkambia ku e klientenan di e blòknan ku a keda bishitá.
Gerensia di SDKK ta sumamente kontentu di por a risibí e Komishon di Hustisia i Seguridat di Tweede Kamer i tambe nos parlamentarionan di Kòrsou i representante di Hulanda aki na Kòrsou.
