Publiká riba 19 Yanüari 2025
WILLEMSTAD- Djaweps 16 di yanüari 2025 , Sentro di Detenshon i Korekshon Kòrsou a risibí bishita di un delegashon for di Hulanda. E delegashon akí tabata konsistí di minister di Hustisia i Seguridat sr. David van Weel huntu ku su delegashon i tambe kolaboradornan di representante di Hulanda na Kòrsou i Sektòr Direktor di JER sr. Reginald Römer.
E meta di e bishita akí tabata pa sera konosí ku e tim di maneho di prizòn, retonan i tambe e nesesidatnan ku SDKK tin. Despues e bishita a kontinuá ku un rekorido den e instituto.
Durante e rekorido ku a tuma lugá a bishitá e departamento di Vocational Building (OVT), blòknan 8a, 2, FOBA, Kushina, departamento di hende muhé i tambe e kamber di bishita di famia nobo. Tambe e bishitantenan tabatin oportunidat pa por a interkambia ku e klientenan ku ta den e trayekto di resosialisashon.
Gerensia di SDKK ta sumamente satisfecho ku e bishita risibí di e minister di Hustisia i Seguridat for di Hulanda huntu ku su delegashon.
