Minister di Enseñansa, Siensia, Kultura i Deporte, sra. Marilyn Alcalá-Wallé a hasi un bishita ofisial na Madurodam (Den Haag) kaminda sra. Thea van de Dulk komo anfitrion i archivares di Madurodam a otorgá Minister Marilyn Alcalá-Wallé e biografia di sr. Maduro kompañá pa un rekorido den e parke históriko. Minister a realisá na prinsipio un bishita na e teater di George Maduro situá na entrada di e parke, kaminda tur bishitante ta mira un video inkluyendo e impreshonnan di e bida di George Maduro.
George Maduro a nanse na Kòrsou 15 yüli 1916 for di mayornan Hudiu Sefárdiko. Despues e famia a muda i bai biba Hulanda. George a base di su aktuashon heroiko durante di Segunda Guera Mundial a risibí un rekonosementu ofisial Hulandes póstumo riba 9 mei 1946 komo “Ridder 4de klasse der Militaire Willems-Orde”. E kapital pa kuminsá konstruí Madurodam a ser regalá pa e mayornan di George John Lionel Maduro (1916-1945) ku e speransa ku esaki ta bira un monumento di pas i rekuerdo di nan úniko yu hòmber George Maduro ku a lucha i resistí okupashon Aleman den e konfrontashonnan kruel durante Segunda Guera Mundial.
Durante di e rekorido den e parke, sra. Thea den Dulk a konta di e diferente makèt i plannan ku Madurodam tin pa futuro. E buki “Ridder zonder vrees of blaam” ku ta nara e biografia di George Maduro a keda skirbí pa sra. Kathleen Brandt-Kelly i ta disponibel na e librerianan lokal.
Potrèt: Momentu ku sra. Thea van de Dulk ta hasi entrega di e dos bukinan di George Maduro na Minister sra. Marilyn Alcalá-Wallé
Fotógrafo: Caïnva Isenia
