Notisia

Rekonosementu na Alumno Ania Rincon Centeno komo e alumno ku

e mihó resultado pa EFO 2025

WILLEMSTAD – Minister di Enseñansa, Siensia, Kultura i Deporte sr. Sithree van Heydoorn a sera aña eskolar na skol di Fundeshi Emmy Berthold den un tremendo ambiente kaminda a hasi entrega di un regalu na e alumno ku mihó puntonan pa EFO 2025.

E alumno ku e mihó puntuashon tin 13 aña i su nòmber ta Ania Rincon Centeno ku a yega nos pais komo un imigrante for di Venezuela. E alumno aki a tene su diskurso na hulandes kaminda el a indiká di no a siña solamente idioma i matemátika. Pero a para ketu na konosementu ku ta keda duna na skol ku ta importante pero e a enfoká riba balornan manera gratitut, rèspèt, famia, ku e ta karga den su personalidat ku a yud’é logra. A la bes e la gradisí Dios, su famia pa nan amor i sosten, koleganan di skol ku a asept’é, maestronan ku a gui’é , i skol di fundeshi Emmy Berthold. Ania Rincon Centeno a terminá su diskurso kaminda e la indiká pa no tene miedu pa kuminsá algu nobo, ni no tene miedo pa faya. Keda perseverá, nunka entregá. Dios tin un plan perfekto pa kada un di nos.

Minister enkargá ku enseñansa sr. Sithree van Heydoorn a yama e alumno i su mayornan danki i a hasi entrega di un regalu na e alumno Ania Rincon Centeno. Esaki a keda hasí komo muestra di apresio na e alumno komo esun ku e mihó puntuashon pa EFO 2025.

Durante di e mainta alumnonan di vários grupo di e skol a kanta i deleitá tur presente ku kansionnan sumamente alegre dunando honor i gloria na Dios i a la bes nan a gradisí ministerio di ESKD pa na aporte na e trayekto di digitalisashon di nan skol.  Kabes di skol sra. S. Davelaar-Efraci a tene un bunita presentashon ku su léptop nobo spesialmente pa Minister i e delegashon kaminda a traha un kompilashon di e graduashon di alumnonan di grupo 8. Tur alumno su deseo profeshonal a keda presentá den un manera masha bunita i di forma di un produkshon digital.

Despues a sigui ku rekorido den gruponan kaminda por a mira dosentenan den akshon ku e aparatonan elektróniko nobo. Tambe a trese algun punto di mehorashon na minister ku e presidente di digitalisashon a tuma bon nota pa mehorá i traha riba esaki.

Ministerio di ESKD por mira bèk riba un bishita hopi eksitoso i ta gradisí e skol pa e aktividat i presentashonnan. Un danki di kurason na tur personal di e skol di fundesho Emmy Berthold pa e tremendo trabou durante di e aña eskolar ku a pasa i sabi ku boso aporte ta di gran balor. Na mes momento ministerio di ESKD ta deseá tur alumno, studiante, maestro, dosente i personal no-dosente un dushi vakashon.

Pa mas potrèt por bishitá: Bishita na Emmy Berthold

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte