Notisia

WILLEMSTAD – Resientemente Minister di Enseñansa, Siensia, Kultura i Deporte sr. Sithree van Heydoorn tabata invitá pa rèktòr di Vespucci College, sr. Wim de Visser, pa bishitá e skol. Durante di e bishita minister a sera konosí ku presidente di e direktiva sr. Koen Jansen, sra. Mascha Zwanenburg i dosente di e materianan kímika i físika sr. Chris Espinal. Minister van Heydoorn tabata akompañá pa kolaboradó di maneho sra. Feijidi Ayubi-Narvaez i konsehero sra. Cindy do Rego.

Presidente di direktiva sr. Koen Jansen a splika ku e skol tabata instituí kasi 25 aña pasá pa Ministerio di Defensa di Hulanda spesialmente pa brinda enseñansa na yunan di militar ku ta bin traha na Kòrsou pa un tempu. Aktualmente e skol ta haña alumnonan lokal, pero tambe yu di personanan ku ta traha pa un tempu kòrtiku na entidatnan manera Ministerio Públiko, RST, i di kadena/poder hudisial hulandes. Pues e grupo di enfoke ta alumnonan ku ta papia hulandes i ku ke mantené nan mes na enseñansa segun e kuríkulo di Hulanda. Aktualmente e skol ta konta ku un total di 180 alumno i ta inspekshoná pa Inspekshon di Hulanda. E skol a eksperensiá un kresementu último tempu. Tambe a informá minister ku e skol ta stimulá integrashon i ku bou di guia di dosente sra. Charlene Merite ta stimulá konosementu di papiamentu i kultura di forma masha inovativo i kreativo serka e alumnonan.  

Direktor di e skol a splika Minister i hasi un petishon formal na minister pa e skol haña eksonerashon pa ku e materia di papiamentu komo materia di èksamen. Tambe nan a hasi petishon pa duna e materianan na Kòrsou mes segun e kuríkulo hulandes mes. Sr. Chris Espinal, dosente na e skol, a splika minister di e investigashon k nan a hasi huntu ku alumnonan di e skol pa asina baha gastu di koriente i pone rko den tur klas. Esaki a resultá den un implementashon kaminda a lansa e proyektonan di instalashon di panel solar. A la bes a duna minister splikashon i un rekorido den e lokalidatnan di e skol.  

Minister Sithree van Heydoorn por mira bèk riba un bunita bishita i sigur ta bai wak un manera pa traha mas di aserka ku e skol. 

—

KOMUNIKASHON

Pa mas potrèt bishitá: Bishita na Vespucci College

MAS NOTISIA

Ministerio konserní: Enseñansa, Siensia, Kultura & Deporte