Notisia

WILLEMSTAD –Ministerio di Enseñansa, Siensia, Kultura i Deporte (ESKD) i Minister  sr. Sithree van Heydoorn a hasi bishita e aña aki na dos skol spesial riba promé dia eskolar. Pa mustra ku tur alumno su desaroyo ta importante i esensial a skohé e aña aki pa bishitá skolnan e aña eskolar. A bishitá e skol Manuel Carel Piar ku ta un skol di fundeshi spesial i e skol spesial avansá sekundario Marieta Alberto. Durante di e bishita a dialogá i kombersá ku direktiva di e skol i alumnonan kaminda a para ketu na edukashon, formashon i enseñansa.

 Na e skol di fundeshi spesial Manuel Carel Piar, minister i e delegashon a tene komberashon hopi interesante ku direktor i alumnonan. E skol spesial aki ta kaminda ta pone énfasis na e alumno i traha ku den pas i harmonia  tin mas o ménos 56 alumno di e edat di 4 pa 15 aña. E skol ta pone enfasis na enseñansa pero ta forma i guia e alumno pa stima naturalesa, empatia pa kuido di animal, sosten den formashon finansiero kaminda na manera simpel ta stimulá sparmentu i tambe formashon kulinario. Pa yuda e alumno su formashon tur mainta e alumnonan bou di guia ta prepará yerba pa tur hende ku ke bebe, a la bes nan ta prepará desayuno pa e alumno ku no tin i ta mustra riba e echo ku nos ta kuida otro. Pa ku e parti di formashon finansiero ta yuda stimulá e hóben pa spar di formanan masha kreativo i tambe nan ta enfoká riba plantamentu i kuido di bestia. Direktor di e skol a trese diferente punto importante dilanti den kuadro di informashon relashoná ku skolnan speshal. Minister i representantenan di ministerio a haña e puntonan aki hopi bon i a tuma nan na serio pa  sigui traha na bienestar di e alumno i nan mayor.   

Na skol spesial avansá sekundario Marieta Alberto, maestro i alumnonan a risibí minister i e delegashon den un ambiente hopi sosial i ameno. Tur alumno a saludá i yamam minister bon bini for di entrada na porta. Despues minister a reuní ku direktiva di e skol i dos alumno bou di guia a sirbi minister i e delegashon.  Durante di e reunion a para ketu na e guia ku e alumnonan ta haña i ku despues ku nan kaba mester sigui haña guia pero ku mester traha riba esaki. E parti aki tambe ta bai haña atenshon di ministerio. Na e skol aki ta traha ku hóbennan di edat di 16 te ku 24 aña i aktualmente nan tin un total di mas o ménos 60 alumno. Despues minister a hasi un rekorido i pasa den tur e gruponan kaminda alumnonan a tene presentashon chikí i òf a kombersá ku minister i e delegashon.  

 Ministerio di ESKD por mira bèk riba un bishita eksitoso i a la bes ta deseá tur alumno,  maestro, dosente, personal atministrativo, personal no-dosente, i mayor éksito den e aña eskolar aki. E bishita aki ta mustra riba e echo ku inklushon ta importante i tur mucha tin atenshon di e ministerio pa sigui traha na desaroyo di nos muchanan.  Pa mas potrët bishita e facebook di Ministerio di ESKD: Facebook Ministerio di ESKD

— 

KOMUNIKASHON 

MAS NOTISIA

Ministerio konserní: Enseñansa, Siensia, Kultura & Deporte