WILLEMSTAD- Gerensia di Sentro di Detenshon i Korekshon Kòrsou ta informá komunidat ku entrante 15 di febrüari 2024 lo anulá e bistimentu di tapa boka obligatorio durante bishita, pero ta liber pa bisti esaki. Esaki ta debi na e sifranan ku a baha di e kasonan di Influenza i Covid den nos komunidat.
Tur demas reglanan si ta keda vigente, esta ku tur bishitantenan mester presentá ku identifikashon valido, vestuario adekuá i sigui instrukshon di e personal di prizòn.
Gerensia di SDKK, ta pidi pa komunidat tuma bon nota di e anunsio akí. Pa mas informashon por yama nos departamento di bishita na 4348428 òf 4348455.
