Publiká riba 06 Yüni 2024
Willemstad: Di 2 di sèptèmber pa 20 di òktober 2023, Ofisina Sentral di Statistik (CBS) a realisá un Senso na Kòrsou. A alargá e periodo ofisial di e Senso te fin di febrüari 2024. Unabes ku e periodo ei tabata tras di lomba, CBS a kuminsá traha intensivamente pa prosesá e datonan di Senso. CBS a presentá 4 di yüni e Promé Resultadonan di Senso 2023, ku statistik tokante situashon sosioekonómiko na Kòrsou.
Riba CBS su wèpsait di Senso, https://senso.cbs.cw/ por haña un dokumento mas amplio ku e promé resultadonan di Senso 2023 i por download esaki grátis.
Aki ta sigui algun di e resultadonan importante di Senso 2023:
Segun Senso 2023, Kòrsou tin 155.826 habitante: 70.162 hende hòmber i 85.596 hende muhé. Sekso di 68 persona no ta konosí.
Kompará ku e Senso di 2011, por mira un oumento di 5.263 persona.
Di 2011 pa 2023, poblashon a krese ku 3,5 porshento.
Pa loke ta trata e proporshon di hende hòmber i hende muhé, segun e resultadonan di Senso 2023, na Kòrsou tin 82 habitante hende hòmber pa kada 100 hende muhé. Diesdos aña pasá, na 2011, tabata 84,3 hende hòmber pa kada 100 hende muhé. E kantidat di hende hòmber na komparashon ku hende muhé ta bahando; òf, por bisa tambe: kada bes tin mas tantu hende muhé na komparashon ku e kantidat di hende hòmber.
Poblashon di Kòrsou ta embehesiendo. Na 2023, 24,7 porshento di poblashon ta kai den e kategoria di 65 aña òf mas. Na 2011, e grupo ei tabata apénas 13,8 porshento. Na mes momento, e porsentahe di mucha (0-14 aña) tambe ta birando ménos: di 19,5 porshento na 2011 pa 14,1 porshento na 2023.
Na 2023, 75,4 porshento di poblashon ta nasé na Kòrsou. Na 2011, e grupo ei a forma 75,8 porshento.
Persona nasé na Hulanda ta forma 5,8 porshento na 2023, persona nasé na República Dominicana, 3,6 porshento i persona nasé na Colombia, 3,7 porshento. Por mira un oumento konsiderabel den e personanan nasé na Venezuela, ku awor ta 2,7 porshento. Na 2011, e porsentahe di e gruponan akí tabata 6,0, 3,6, 3,0, i 1,2 porshento respektivamente.
Te asina leu, ainda religion Katóliko Romano ta e denominashon mas grandi, ku 68,2 porshento di poblashon. Esaki ta un bahada kompará ku 2011 (72,8 %).
Na 2023, tabatin 60.075 kas di famia, ku un promedio di 2,5 persona pa kada kas di famia. Tamaño di kas di famia a bolbe baha kompará ku e sensonan anterior (2001: 3,0 persona, 2011: 2,7 persona).
Kompará ku 2011, e kantidat di kas di famia a oumentá ku 5.139, ku ta un oumento di 9,4 porshento.
Na 2023, e porsentahe di mucha i hóben di 4 te ku 18 aña (edat di enseñansa obligatorio) ku ta bai skol di den dia ta 96,3 porshento. E porsentahe ei ta mas haltu ku na 2011: 96,1 porshento. E porsentahe pa 2023 ta basá riba kontesta di 95 porshento di e partisipantenan di 4 te ku 18 aña.
Porsentahe di desempleo a baha di 9,9 porshento na 2011 pa 7,0 porshento na 2023. Tin 15,0 porshento di desempleo hubenil (15-24 aña) na 2023, kompará ku 22,8 porshento na 2011.
A konta 60.075 bibienda privá, i gran mayoria ta konsistí di kas pará riba nan mes den kurá: 82,4 porshento.
E kantidat di bibienda privá ku ta kas propio a subi di 67,8% na 2011 pa 69,9% na 2023.
Ofisina Sentral di Statistik ta gradisí tur habitante di Kòrsou pa nan partisipashon na e último Senso akí. E promé resultadonan ta disponibel pa un i tur, tantu riba wèpsait di Senso, senso.cbs.cw, komo riba wèpsait ofisial di CBS: www.cbs.cw. Den e lunanan benidero, gradualmente CBS lo publiká mas tabèl, ku tur e resultadonan di Senso 2023.
